Hypercholestérolémie familiale (HF) heescht déi Veranlagung. Am Duerchschnëtt huet se eng Persoun op 250. Onbehandelt féiert se dozou, datt ee schonn am jonken Alter, also mat 30, 40 Joer een Häerzinfarkt oder Hiereschlag erleide kann, erkläert Dr. Marianne Becker, pediatresch Endokrinologin am CHL.
Depistage kann den Ament op zwou Plazen am Land gemaach ginn
Grad an engem jonken Alter gëtt een héije Cholesterinwäert net ëmmer eescht geholl, gëtt d’Marianne Becker ze bemierken.
"Es gibt Studien, die ganz klar zeigen, wenn man das schonn früh anfängt zu behandelen, von der Kindheit an, dann entwickeln diese Menschen keine kardiovaskulären Erkrankungen. Also, man kann wirklich den frühen Tod verhindern."
Mam systemateschen Depistage vu klenge Kanner wëllt een deem virgräifen. Soubal ee Kand hei am Land 18 Méint huet, ginn d’Elteren ugeschriwwe fir ee Rendez-vous ze maachen. An enger éischter Phas wäert just an der Stater an an der Escher Maison médicale méiglech sinn. Vum nächste Joer u soll den Test och zu Ettelbréck ugebuede ginn.
Medikamenter fir eng normal Liewenserwaardung
Den Test besteet aus engem klenge Blutttest, mat engem Pick an de Fanger. D’Resultat huet ee scho puer Minutten drop. Sollt dee positiv sinn, kann ee sech d’Resultat an enger genetescher Analys confirméiere loossen.
An deem Fall kënne sech dann och d’Elteren oder eventuell Geschwëster teste loossen, well et jo eng genetesch Krankheet ass.
D’Behandlung ass medikamentéis. Déi Medikamenter kréie Kanner awer réischt vu sechs Joer un. Dës Medikamenter garantéieren déi selwecht Liewenserwaardung, wéi wa si keen HF hätten. Mee et wäert ee se säi Liewe laang huele mussen.
Och Kanner iwwer 18 Méint oder Erwuessener kënne bei hirem Generalist froen, fir eng Bluttanalys gemaach ze kréien.
