Dës Projete ginn zu 20 Prozent vun der Gesondheetskeess finanzéiert, an zu 80 Prozent duerch de Staat. Dowéinst wier et wichteg, se relativ staark am Bléck ze behalen, seet de President vun der Budgetskontrollkommissioun Franz Fayot. Et geséich awer net esou aus, wéi wa bei de Kliniksinfrastrukture Méikäschten op de Staat géifen duer kommen, esou den Oppositiounsdeputéierten no der Sitzung vun haut.
"Et sinn der eng Rei, déi si scho realiséiert. Dat sinn haaptsächlech d’Projeten nei Maternité, awer och d’Projete vum HRS (Hôpitaux Robert Schuman), vun der Psychiatrie juvénile, wou mir am Budget dra sinn. An och déi aner, déi réischt zum Deel wierklech realiséiert sinn oder ugefaangen hunn, wéi d’Südspidol zu Esch, och do gesäit et awer ganz dono aus, wéi wa mer kéinten am Budget bleiwen."
Grad zu Esch misst awer lo mat der Ännerung vum Architekt gekuckt ginn, datt een an der Enveloppe dra bleift. De Franz Fayot ass awer zouversiichtlech, datt et net zu villen Depassementer kënnt.
Am Südspidol solle bis spéitstens 2032 déi éischt Patiente behandelt ginn, hat de President vum CHEM-Verwaltungsrot, den Escher Buergermeeschter Christian Weis Mëtt Februar am 100,7-Interview ugekënnegt. Den CSV-Politiker hat och gesot, datt d’Südspidol méi wéi déi aktuell geplangte 542 Milliounen Euro wäert kaschten.
