Wéi australesch Medie mellen hätte béid Nopeschlänner haut een deementspriechend Ofkommes ënnerschriwwen. Dat um Bord vun engem Treffe vun de Pazifeschen Inselstaaten op de Cookinselen am Südpazifik.
All d’Awunner vun Tuvalu dierften an Zukunft an Australien schaffen, studéieren a liewen. Dat huet den australesche Premier Anthony Albanese zesumme mat sengem Homolog vun Tuvalu, dem Kausea Natano, annoncéiert. D’Existenz vun Tuvalu wier bedreet, esou den australesche Premier. Hie wier der Meenung, datt d‘Industrienatiounen d‘Verantwortung hätten Hëllef ze leeschten, a genau dat géing Australie maachen.
Aus moralescher Siicht een néidege Schrëtt
Fir den Ufank wëll déi australesch Regierung 280 Bierger d’Joer aus dem Nopeschland ophuelen. An net emol 100 Joer kéint Tuvalu awer scho komplett am Pazifik versenken. Am Südpazifik klëmmt de Mieresspigel op Grond vun der Äerderwiermung nämlech besonnesch séier. Bis dohinner sollen all déi vum Klimawandel betraffen Awunner kënnen an Australien eriwwer plënneren.
Australien ass ee vun de gréisste Kuelen-Exporteure vun der Welt. Vill Pazifik-Staate fannen dee Schrëtt vun Australien deemno noutwenneg, och aus moralescher Siicht. D’USA hunn iwweregens schonn een änlecht Ofkommes mat ënnert anerem Palau an de Marshallinselen ënnerschriwwen, déi och riskéieren am Pazifik ze verschwannen.
