D’Elisabeth Mevissen ass an hirem Liewe scho vill ronderëm komm. Nodeems si ënner anerem Pädagogik a Sozialaarbecht studéiert hat, huet si puer Joer laang an der Europaschoul geschafft. Zesumme mat hirem Mann, deen op enger Bank geschafft huet, ass si vill duerch d’Welt gereest. Nodeems si 3 Kanner kritt hat, ass si dunn awer doheem bliwwen.
Zënter 20 Joer ass d’Elisabeth Mevissen och nees zu Lëtzebuerg. Méi wéi d’Hallschent vun hirer Famill wier ronderëm de ganze Globus verstreet, zielt si am 100,7-Moiesstudio.
Sozial Projeten ënnerstëtzen
An der Pensioun wollt d’Elisabeth Mevissen dann awer net just bei normale Vakanze beloossen, mee si wollt och mol méi laang op eng Plaz liewe goen, an zwar als Volontaire. Dat war schonn ëmmer hire Wonsch.
Viru ronn 10 Joer huet si dunn den Internetsite granny-aupair.com entdeckt. Dëst ass eng Zort Vermëttlungsagence, déi vun der Däitscher Michaela Hansen zu Hamburg gegrënnt ginn ass. D’Agentur vermëttelt eeler Fraen – also Grannys – déi an der Pensioun sinn, oder Loscht op eng nei Aventure hunn, a Länner iwwerall uechter d’Welt.
D’Konzept vum Au-pair ass bekannt, gëtt awer meeschtens mat jonke Leit a Verbindung bruecht, wann déi an eng friem Famill ginn, do liewen, an der Famill am Alldag eng Hand mat upaken. Granny Aupair bitt d’Méiglechkeet un, e Benevolat virun der Hausdier ze maachen, oder awer vill méi wäit fort ze goen. Am Fall wou ee gären Deel vun engem soziale Projet ass, geet et meeschtens méi wäit fort, erkläert d’Elisabeth Mevissen.
Bis zu 30 Stonnen Asaz pro Woch
Genau dat wollt si och maachen, an huet souguer zu Hamburg u Workshops Deel geholl. D’Agence mat Sëtz an der Hansestad gëllt als ganz seriö, a gouf och scho fir hir Aarbecht ausgezeechent. D’Haaptiddi ass déi, datt eeler Fraen, déi finanziell eventuell net esou gutt opgestallt sinn, nach eng Kéier een aneren Deel vun der Welt kenneléiere kënnen, oder souguer nei Sprooche kënne léieren.
D’Elisabeth Mevissen geet fir dräi Méint an Namibia. Do wäert si an enger Schoul hëllefen. Et handelt sech dobäi ëm eng Montessori*-Grondschoul. Dëst wier genau hire Kompetenzberäich, esou d’Elisabeth Mevissen. An och Afrika hätt scho laang ganz uewen op hirer Lëscht gestanen. Bis zu 30 Stonne pro Woch wäert si benevoll am Asaz sinn. D’Rees dohi gëtt aus eegener Täsch bezuelt. Dobäi kommen een Deel vun de Käschte vun der Ënnerkonft, genau esou wéi d’Iessen.
3 Méint an Namibia ... oder och méi
Wunne wäert si an enger Wunneng, déi Deel vun der Schoul ass, a réischt viru Kuerzem fäerdeggestallt ginn ass. Hei ass Plaz fir zwou Granny-Aupairs. Den Openthalt wäert mindestens 3 Méint daueren, erkläert d’Elisabeth Mevissen. Sou laang ass et méiglech, visafräi an Namibia ze bleiwen. Si schléisst awer net aus, datt wann et hir gefält, dësen Openthalt nach verlängert gëtt.
Hir 3 Kanner waren iwwerdeems net vun där Iddi iwwerrascht. Si hu sech begeeschtert gewisen, datt hir Mamm am Alter vu 70 Joer sech nach eng Kéier op sou eng Aventure aléisst.
* D'Montessori-Pädagogik ass eng global, sozial Beweegung, déi als Zil huet, datt Kanner iwwerall ronderëm d'Welt vun hir profitéiere kënnen. D'Montessori-Beweegung zeechent sech doduerch aus, datt d'Leit sech engagéieren, d'Kanner a Jugendlecher mat Suergfalt a Respekt ze behandelen. All Kand gëtt als wäertvollen Individuum ugesinn an huet d'Recht op Qualitéitsausbildung. (Source: montessori-deutschland.de)
