Am Kader vun "Les Ballades du Carillon" spillt de Carillonneur vun der Iechternacher Basilika véier Mol am Summer ee Concert. D'Journalistin fir klassesch Musek, d'Marie Schockmel, war sech esou ee Concert ulauschteren an huet mam Carillonneur Fabrice Renard geschwat.
De Carillon - änlech wéi d'Uergel an dach anescht
D'Instrument vum Carillon ass änlech ewéi eng Uergel an awer dach net d'nämmlecht. Et spillt een dëst Instrument mat de Féiss a mat den Hänn - oder fir méi genau ze sinn, mat de Fäischt.
De Carillonneur schléit op déi holzen Tasten, an all Tast a Pedall ass duerch e Kabel mat enger Klack verbonnen, soudass vill Téin zur selwechter Zäit entstoe kënnen.
Trotzdeem seet de Carillonneur vun der Basilika, de Fabrice Renard, datt de Carrillon kee ganzt physescht Instrument wier - senger Meenung no wier dee physeschsten Deel, fir bei d'Instrument ze kommen. Dat steet nämlech an engem vun den Tierm vun der Basilika op ronn 80 Meter Héicht an ass just iwwer vill Trapen ze erreechen.
"Je décolle de la planète"
De Fabrice Renard ass den éischte Carillonneur vun der Iechternacher Basilika, a fir hien huet säi Beruff eng grouss Bedeitung:
"Moi j'aime beaucoup être ici, parce qu'on est dans une paix royale. C'est fantastique, personne ne sait vous atteindre. Je coupe mon GSM, je décolle de la planète."
Anescht wéi een et villäicht denke géif, spillt de Fabrice Renard um Carillon vill verschidde Wierker - vu klassesch iwwer sakral Stécker, bis bei d'Film- a Rockmusek. Hien huet och eng grouss Passioun fir d'Musek vun der Popsängerin Dua Lipa, a plangt schonn, e Projet heiriwwer ze entwéckelen.
Ënner ville Momenter, déi de Fabrice Renard ni vergiesse wäert, ass de Concert vum 31. Juli 2022. Do huet hien zesumme mat de Pompjeeë vun Iechternach e ganz spezielle Concert ginn: De Public huet ofwiesselend de Carillon vun uewen aus dem Tuerm héieren an d'Sireen vum Pompjees-Camion ënne virun der Entrée vun der Basilika.
Niewent de speziellen Optrëtter an de Concerten "Les Ballades du Carillon", spillt de Fabrice Renard och op dësem Instrument fir Chrëschtdag a fir Péngschten.
De leschte Carillon-Concert vun dësem Summer zu Iechternach ass e Mëttwoch, de 24. August 2022. Méi Informatioune fannt dir hei.