Literatur Poesie-Concours Victor Hugo 2021 zu Veianen

Vum 8. Juni bis den 22.August 1871 war de franséische Schrëftsteller Victor Hugo zu Veianen am Exil. D'Haus, an deem den engagéierten Humanist zwee an en hallwe Mount gewunnt huet, ass 1944 vun den däitschen Truppen esou beschiedegt ginn, datt nom 2. Weltkrich eng Rekonstruktioun néideg war.

Eng Rei Festivitéiten geplangt fir 2021

Schonn 1935 war den éischte Victor Hugo Musée entstanen. Les Amis de la maison de Victor Hugo à Vianden gëtt et schonn zënter 1937, d'Associatioun huet sech no der Opléisung vum Victor Hugo-Comité gegrënnt, Presidentin war deemools d'Anne Beffort.

Zënter deem huet sech vill gedoen a vill geännert, ma de Musée an de Comité si bliwwen. Iwwer de Musée littéraire Victor Hugo seet d'Presidentin Guida Biewer:

"Eng vun eisen Aufgaben ass d'Erënnerung un de grousse Schrëftsteller a Poet, deen de Victor Hugo war, oprecht ze halen, mir bedeelegen eis u Publikatiounen vun neie Bicher, ech erënneren do un dat wat mer virun zwee Joer ënnerstëtzt hunn, d'Publikatioun vum Buch vum Yves De Smet "Victor Hugo à Vianden"."

Poesie-Concours iwwer "La Liberté"

Am Kader vum 150 Gebuertsdag vum Hugo sengem Exil zu Veianen sinn eng ganz Rei Festivitéite geplangt. Dorënner och ee Poesie-Concours zum Sujet "La liberté". Vum 6. Dezember bis den 4.Abrëll d'nächst Joer kann een ee Gedicht aschécken. D'Guida Biewer erkläert:

"Et ass e Sujet, deen eigentlech ganz aktuell ass, dee schonn ëmmer en Thema war fir de Mënsch, an den Hugo huet dat ganz oft a senge Bicher a Gedichter traitéiert, dofir war elo bei eis d'Decisioun gefall dann och dëse Sujet auszewielen."

Dem Concours ass e strikte Kader gesat, d'Gedicht muss op d'mannst aus véier Zeile bestoen an d'Längt vun enger DIN A4-Säit net iwwerschreiden. An et muss op Franséisch verfaasst sinn:

"Op Franséisch, well de Victor Hugo e franséische Schrëftsteller war an op Franséisch geschriwwen huet, dofir eise Wonsch fir déi Saachen dann op franséisch eran ze ginn."

Dräi Gedichter, déi enger Jury, déi nach am Opbau ass, anonym virgeluecht ginn, wäerte priméiert ginn.

"Mir hoffen, dass mer vill Gedichter era kréien, an dono wollte mer d'Laureaten éieren an op eng "Soirée de Poésie" invitéieren, wou mer dann déi Gedichter virdroe kënnen. Ech denken, datt mir dann och kënnen eng Broschür eraus ginn, wou déi Oeuvren dann och dem Publique presentéiert ginn."

2021 ass also d'Victor Hugo Joer zu Veianen. De Schrëftsteller huet wärend sengem Openthalt hei eng ronn 50 Gedichter geschriwwen, wat just e klengen Deel vu sengem Recueil ausmécht, also falls et un Inspiratioun feelt... avis aux amateurs!