Cineast Mystesch-romanteschen Trip am "clair-obscur"

"November", vum estnesche Realisateur Rainer Sarnet, ass ee barocke Libesfilm, deen de Spectateur an eng mystesch Welt mat enger Hellewull u skurrille Personnagë verféiert. Déi wonnerschéi schwaarz-wäiss Biller schafen eng ganz speziell Atmosphär. Aus der offizieller Competitioun vum CinEast-Festival.

Michel Delage

november_03.jpg
Jette Loona Hermanis a Rea Lest (Foto: CinEast-Festival)

An engem Duerf an Estland am 19. Joerhonnert. D'Baueremeedche Liina ass an de Bauerejong Hans verléift. Den Hans huet sech allerdéngs vun der jonker däitscher Baronin bezaubere gelooss, déi mat hirem Papp an d'Schlass agezunn ass. Wat maachen? D'Baronin ëmbréngen? Oder gëtt et soss eng Méiglechkeet?

D'Handlung vun "November" vum estnesche Realisateur Rainer Sarnet ass einfach gestréckt. Mä den Interessi vum Film läit anzwousch anescht. Et ass eng Zort Mäerchen, e romantescht Drama, ee barockt Wierk, dat Elementer aus dem baltesche Folklor, populärem Awerglawen an Zauberei mat enger realistescher Beschreiwung vum Liewen um Land zu där Zäit matenee vermëscht.

Galerie vu skurrille Personnagen

De Rainer Sarnet zeechent de Portrait vun enger Duerfgemeinschaft, säi Film ass eng Galerie vu skurrille Personnagen, eng Sammlung vu groteske Schnësser - d'Schéinheet vum blonde Liina stécht ëmsou méi do eraus. Ënnert de Personnagë fënnt een och d'Verkierperung vun der Pescht (déi mol d'Zich vun enger Geess, mol déi vun enger schéiner jonker Fra unhëlt). An da gëtt et déi vu Geeschter beséilte Kreaturen, wéi dee ganz poetesch ugehauchte Schnéimännchen oder dat rabiat Wiesen, dat aus dem Kapp vun engem Kallefsskelett a Gaardegeschir zesummegesat ass an och emol gäre mat Kéi duerch d'Luucht gehäit!

D'Welt vun de Baueren ass eng graff, deen am Film ganz präsenten Humor ass deementspriechend - e bëssen an der lëschteger Traditioun vun engem Rabelais a Frankräich. Am Kontrast dozou wierkt de verklemmte Baron natierlech ridicule. Zum Beispill an der Zeen, wou säin Dénger am Park virum Schlass emol haart ee léisst - de steiwe Schrëtt vum Baron während dem Spadséiergang gëtt ee Moment liicht destabiliséiert ...

Foto: CinEast-FestivalImpressionnante "clair-obscur"

Déi grouss Reussite vun "November" ass déi schwaarz-wäiss Fotografie. Dee wonnerschéine "clair-obscur" vun den Nuetszeene sculptéiert déi impressionnant Galerie vu Gesiichter (zum Beispill d'Fale vun der Hex) a schaaft - je no Zeen - eng besonnesch Atmosphär: gotesch/romantesch (besonnesch wann d'Baronin nuets um Daach vum Schlass schlofwandelt); bedréckt (zum Beispill wann de physesch imposante Bauer sech a senger Bud iwwert d'Liina wëll stierzen); magesch (Nuetszeenen am Bësch). Déi dacks mystesch Atmosphär gëtt zousätzlech ënnerstrach duerch déi avantgardistesch Musek vun der polnescher Band Jacaszek.

De Film ass allerdéngs ze laang. Zemools den éischten Drëttel, an deem d'Spectateuren d'Personnagë solle kenneléieren, ass e bësse konfus, an et versteet een net richteg, wou et soll higoen. Alles an allem ass "November" awer een originelle Film, dee vu villen interessanten Iddien nëmmen esou iwwerleeft. Mä dat hu barock Wierker jo esou u sech.

Méi zum Thema

Rainer Sarnet.jpg
Cineast

Eng spirituell a mystesch Welt mécht d'Grenze vum Kino méi grouss op, esou de Rainer Sarnet iwwert säin neie Film "November" am 100,7 Interview. Trotzdeem wier säin Zil e realistesche Film.

miracle_07.jpg
Cineast

"Miracle" (Stebuklas) vun der litauescher Realisatrice Egle Vertelyte setzt sech - op eng humoristesch Aart a Weis - mat de soziale Konsequenze vum Zesummebroch vun der Sowjetunioun auserneen.

directions_03.jpg
CinEast

"Directions" hëlt d'Spectateure mat op eng Taxirees duerch déi bulgaresch Haaptstad Sofia an hir sozial Problemer. Originell opgebaut, ganz gutt gespillt an technesch brillant ëmgesat.

FullSizeRender.jpg
Cineast

De Stephan Komandarev bezeechent sech als Optimist. Dowéinst wier de Realisateur vun "Directions" a Bulgarien bliwwen. Mat senge Filmer wëllt hien der Societéit säi Stéck Optimismus schenken.

daybreak_03.png
CinEast

"Daybreak" beschreift den Alldagskampf vun enger elengerzéiender Mamm an Albanien. Den albanesche Realisateur Gentian Koçi erreecht mat engem minimalistesche Stil eng grouss Wierkung.

filthy_01.jpg
CinEast

"Filthy", vun der jonker slowakescher Realisatrice Tereza Nvotová, ass een däischtere Film iwwer Vergewaltegung. Duerch an duerch pessimistesch, mä filmesch gutt ëmgesat, fënnt de Michel Delage.

Tereza Nvotová
Cineast

De slowakesche Film "Filthy" soll d'Diskussioun iwwert d'Vergewaltegung am Land opmaachen, seet déi jonk d'Realisatrice Tereza Nvotová am 100,7-Interview. Et wier dat lescht Tabuthema.

Aurora Borealis.JPG
CINEAST

Den Drama "Aurora Borealis: Northern Lights" vun der Ungarin Márta Mészáros ass ee Spuerespill iwwert d'Opschaffe vu schwéiere Familljegeheimnisser. Kohärent a gelongen, fënnt de Michel Delage.

Programm

Net verpassen

Dossieren

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen