Luxfilmfest Jiddwereen op senger Plaz

De japanesche Film "Aristocrats" problematiséiert d'Roll vun der Fra a gehuewene Kreesser. Duergestallt gëtt eng friddlech Gesellschaft, där hir rigid Klassestruktur awer net ze veränneren ass.

Michel Delage

Kompetitioun Aristocrats
D'Miki (Kiko Mizuhara) lieft der Hanako (Mugi Kadowaki) vir, datt et och anescht geet

Fir d'Hanako (Mugi Kadowaki), eng jonk Fra vun Enn 20 aus besserem Haus, gëtt et esou lues Zäit fir dee richtege Mann ze fannen. D'Famill kéint sech do gutt en Dokter virstellen, deen dann och d'Privatklinik kéint iwwerhuelen.

Wéi si de Koichiro kenneléiert, steeräichen Ierwe vun enger Industriellendynastie, iwwertrëfft d'Hanako d'Erwaardungen. No der Verlobung stéisst déi jonk Fra duerch Zoufall op deem seng Maîtresse (Kiko Mizuhara), e Meedchen aus enger bescheidener Famill.

Eng besser Hausfra

Fra sicht a fënnt de Märcheprënz: wài eng romantesch Komedie vun zwee Su fänkt et un. Mee ''Aristocrats'' vun der Japanerin Yukiko Sode entwéckelt sech lues a lues zu enger subtiller Analys vun der Roll vun der Fra a gehuewene Kreesser.

Eng besser Hausfra sinn a fir (am beschte männlechen) Nowuess suergen, dat Schicksal deele vill Frae vun der Upperclass. Ëmgedréint dierf, wien aus enger méi modester Famill kënnt, héchstens fir de Spaass vun den Alphadéiere suergen.

Datt et och anescht kéint sinn, gëtt ee sech meeschtens am Verglach mat Leidensgenossinnen aus anere Milieue bewosst.

Sozial Ënnerscheeder

Déi sozial Stratifikatioun am Film an déi domat verbonne Verhalensforme gi vun den dräi Haaptpersonnagë verkierpert: um ieweschten Niveau d'Groussbourgeoisie (oder Adel), mat hire strenge Reegelen an der Suerg, d'Verméigen ze reproduzéieren a sech gesellschaftlech Muecht via d'Politik ze sécheren (Koichiro) ; d'''bourgeoisie aisée'', déi erop wëllt an op kee Fall erof (Hanako); an de Klengbiergertum aus der Provënz, dee weder räich nach aarm ass an hëlt wat e kritt (Miki).

D'Hanako pendelt also tëschent deenen zwee Polen, personifizéiert vum Koichiro (uewen) an der Miki (ënnen). Déi jonk Fra muss duebelt leiden: wéinst de strikte Fuerderunge vun der Famill vum Verloobten a wéinst der Existenz vun enger Rivalin.

Zwou Visioune vun der Klassegesellschaft

An awer bréngt si et fäerdeg, tëschent de Contraintë vun der gesellschaftlecher Positioun an den Individuen ze trennen. Zum Koichiro (dee selwer an engem gëllene Prisong gefaangen ass) ënnerhält si am Fong eng respektvoll Relatioun. An d'Miki lieft hir e Liewen a Fräiheet vir.

''Aristocrats'' liwwert eng Visioun vun der Gesellschaft, déi esouwuel pessimistesch ass (knallhaarden Determinismus) wéi och eng Fënster opmécht (um individuellen Niveau kann ee mateneen eens ginn). De Film ass deementspriechend roueg, ouni wierklech dramatesch Momenter a mat enger doucer Geiemusek ënnermoolt

Sou gesinn ass der Yukiko Sode hire Film de komplette Géigendeel vum Koreaner Bong Joon-ho sengem präisgekréinte ''Parasite'', deen eng direkt an drastesch Konfrontatioun tëschent Bourgeoisie a Proletariat duergestallt hat. Engersäits huet een also friddlech sozial Relatioune fir de Präis vun enger Gesellschaftsstruktur, déi bleift wéi se ass. Anerersäits de Klassekampf mat der Hoffnung op sozial Verännerungen.

Méi zum Thema

Careless Crime Kompetitioun
Luxfilmfest

Rekonstitutioun? Transpositioun? Oder einfach nëmme Konfusioun? Mat engem Spill mat der Realitéit an der Illusioun stellt den iranesche Film ''Careless crime" de Spectateur op d'Prouf.

Air Conditioner 02 © Geração 80 Kompetitioun
Luxfilmfest

Klimaanlagen als leschten Depositär vun der kollektiver Memoire nom Biergerkrich: Dee Science-Fiction-Zeenario steet am Mëttelpunkt vum Angolaner Fradique sengem Filmdebut "Air Conditioner".

QUO VADIS AIDA © Cinéart (3)-1.jpg Kompetitioun
Luxfilmfest

''Quo vadis, Aida?" erzielt d'Tragedie vu Srebrenica aus der Perspektiv vun enger Fra, där als Iwwersetzerin d'Hänn gebonne sinn. Als Mamm gëtt si virun onméiglech Decisioune gestallt.

Programm

Net verpassen

  • Annonce: Recherche d'un chef de la programmation

    Gebai vum radio 100,7

    L'Etablissement de Radiodiffusion Socioculturelle, opérateur de la radio de service public radio 100,7, recherche 1 chef de la programmation (m/f) pour contrat à durée indéterminée et à temps plein.

Dossieren

  • Déi eeleft Editioun vum LuxFilmFest

    Trotz Pandemie gëtt de Luxembourg City Filmfestival organiséiert. Déi 11. Editioun (4.-14. Mäerz) kritt dëst Joer awer eng liicht aner Nues: Filmer ginn deels am Kino deels online gewisen.

  • Drogen a Mënschen

    Zanterdeem et d'Mënschheet gëtt, hunn Droge si begleet. Haut hu vill Drogen e schlechte Ruff. Wisou ass dat esou a wat misst geschéien, fir besser iwwer eventuell Risike beim Konsum opzeklären?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen