Firwat d'Aarbecht kuerz an ouni vill Theater mat engem Kappschoss erleedegen, wann ee se fir dee selwechte Präis mat stiechen, metzelen a schneide schéin an d'Längt kann zéien? D'Sich no Effikassitéit ass eben net d'Haaptsuerg vun de Protagonisten am koreanesche Mafia-Film ''Night in Paradise'' vum Park Hoon-jung.
Net ze verwiessele mam däitlech méi ale Park Chan-wook, dee sech virun zwee Joerzéngte mat enger bluddeger Revanche-Trilogie (''Sympathie for Mr. Vengeance'', ''Old Boy'' a ''Lady Vengeance'') international en Numm gemaach hat.
Deem säin Hang zum Sadismus fënnt sech och hei erëm, leider net seng filmesch Inventivitéit. Trotz allem versicht ''Night in Paradise'' e bëssen aus der Rei ze danzen, duerch eng gelunge d'Kombinatioun vu knallhaardem Gangster-Genre a... romantescher Komedie !
Keng héich Liewenserwaardung
Nodeems den Tae-goo, Hoffnungsdréier am Milieu, sech un engem wichtege Boss rächt an esou e Krich tëschent de Clanen ausléist, muss hie sech duerch d'Bascht maachen. Säin Zil ass Vladivostok, mat Tëschestopp an enger Farm um Mier. Do léiert hien eng jonk Fra kennen, där hir Eltere vu Mafiosien ëmbruecht gi waren an déi elo beim Monni lieft (och deen net grad e Massendénger).
Duerch hiert gemeinsaamt Schicksal (si ass stierweskrank an d'Liewenserwaardung vun engem Gangster ass och net ganz héich) komme sech den Tae-goo an d'Fra méi no. Allerdéngs net ze vill: méiglecherweis erënnert si hien u seng eege Schwëster, dat och un enger onheelbarer Krankheet gelidden hat, ier se - wéi soll et anescht sinn? - vu Gangstere liquidéiert gouf.
Net iwwerdriwwe genuch
Zeene vu bluddegem Gemetzel ginn am zweeten Deel scho mol vu méi sonneg-intimistesche Momenter ofgeléist, déi tëschent Witz a Melancholie schwanken. Iergendwann aarten d'''Messerpickereien'' zur grand-guignolesquer Farce aus, an den Hämoglobin-räiche Spektakel géint der Schluss an engem Hangar ass emol net de Klimax vum Film!
Zum Gléck hëlt sech de Realisateur net all ze eescht. Paradoxerweis huet de Park Hoon-jung et net genuch op d'Spëtzt gedriwwen, respektiv ass hien net déif genuch an de mënschleche Wansinn agedaucht, fir datt seng apaart Mëschung géif opgoen. Un d'Filmer vun engem Park Chan-wook, déi och net fir jidderee sinn, kënnt ''Night in Paradise'' mol net usazweis erun.