Invité am Moies-Magazin Ee renomméierte Kenner vum Alexander von Humboldt
Den Ottmar Ette ass Romanist a Komparatist, d'Frankophonie an d'Hispanologie si seng Fuerschungsgebidder. Nieft dem Roland Barthes an dem José Marti ass den Alexander von Humboldt (1769 - 1859) dee Protagonist, deem den Ette vill Zäit vu sengem Liewen dediéiert huet.
"Alexander von Humboldt und die Globalisierung" ass net dat éischt Wierk vum renomméierten Humboldt-Kenner, mee wuel dat komplexstent. Hie setzt den Humboldt an den historeschen a soziokulturelle Kontext, erkläert d'Ëmfeld an deem den Humboldt gelieft, gereest a gefuerscht huet.
De Stand vun der Wëssenschaft um Enn vum 18. Joerhonnert, ekonomesch a geografesch Expansioun, d'Siicht op déi "Nei Welt" an hir Bewunner, d'Iwwerzeegung, datt net-Europäer mannerwäerteg wieren, hunn deemools de Kolonialismus gerechtfertegt.
Mam Humboldt koum et zu engem Paradigmewiessel. De Fuerscher ass éischter als Naturwëssenschaftler bekannt, deen Dausende vun neie botaneschen Aarten entdeckt huet, manner als fortschrëttlechen Denker, Humanist, Vertrieder vum Ëmweltschutz a Kämpfer géint de Kolonialismus a fir d'Gläichberechtegung vun alle Mënschen.
Den Ottmar Ette versetzt sech a senger Fuerschung an a sengem Schreiwen an den Alexander von Humboldt an hëlt och deem säi Modell u bei senger Aarbecht.
D'Valerija Berdi huet sech mam Ottmar Ette ënnerhalen
An der Mediathéik:
LauschterenMéi zum Thema
En Eemer voll aus dem Liewensfloss
"Je n'irai plus jamais à Feodossia" ass den néngte Volume vum Lambert Schlechter senger Serie vu kuerze Prosatexter "Le Murmure du monde". Dës Kéier steet d'Vergänglechkeet vum Liewen am Mëttelpunkt.
Vum Jeeër zum Gejoten?
Dem Nobellaureat Peter Handke säin Don Juan entsprécht net an alle Punkten deem sengem eegene Mythos vum Fraeverféierer. Kann et sinn, datt vläicht dem Molière an dem Mozart hir Don Juanen déi falsch waren?
