"Et ass kee Prix de consécration, och kee Prix fir Ufänger, mee en ass fir Leit, déi schonn e gewësse Wee gaange sinn, a wou ee kann erwaarden, hoffen, datt dee Wee weider féiert!", esou de Lucien Kayser, President vum Institut Grand-Ducal, iwwer d'Motivatioun vum Choix vum Laureat.
D'Aarbechte vum Eric Schumacher hätten direkt déi meescht vun den Institut-Memberen iwwerzeegt, déi de Gewënner vum Prix Arts et Lettres all zwee Joer bestëmmt. De Spectateur kéint d'Fabrikatioun an der Kreatioun novollzéien, esou de Lucien Kayser. Dem Sculpteur seng Aarbechten hätten och eng gewëss Poesie, mat Iwwerraschungen a vill Humor: "Déi Allianz, dat Zesummespill, vu Poesie a Kritik, ass absolutt iwwerzeegend."
International ënnerwee
No Konschtstudien zu Bréissel, Edinburgh a Berlin lieft a schafft de Sculpteur Eric Schumacher haaptsächlech zu Edinburgh. Mee an der Lescht weist e seng Aarbechten och ëmmer méi zu Lëtzebuerg. Hie war 2017 fir d'Triennale Jeune Création an de Rotonde ugeholl ginn; Enn 2019 hat d'Curatrice Stilbé Schroeder hien an dräi weider Artiste fir de Prix d'Art Robert Schumann proposéiert.
2020 hat hien, wärend der Corona-Kris, eng Ausstellung an der Galerie Nosbaum-Reding, duerno goung et direkt weider op Berlin, well e fir eng vun de begierte Kënschtlerresidenzen am Künstlerhaus Bethanien selektionéiert gi war. Aktuell ass den Eric Schumacher nees en Residence: an der neier Escher Konschthal, do wou och d'Iwwerreechung vum Prix Arts et Lettres war.
Bei sengem Schaffmaterial handelt et sech normalerweis ëm Récupe; den Eric Schumacher ass e passionéierte Sammler - an Observateur. "Hien interesséiert sech fir déi archaesch Comportementer, déi mir an eise sterillen, selwer fabrizéierten, Environnementer unhuelen" schreift d'Josée Hansen an hirem Begleet-Text vum Prix Arts et Lettres. Fir da bei sengen Ausstellungen der Strooss, also der Ëffentlechkeet, seng - op den éischte Bléck banal - Trouvaillen, op eng subliméiert bis humorvoll Aart a Weis zeréck ze ginn.
Fir den Eric Schumacher ass de Präis, dee mat 5.000 Euro dotéiert ass, eng gewëss Unerkennung: "Dat gëtt engem e bësse Sécherheet, datt ee vläicht awer eppes mécht, wou een um richtege Wee ass, wann een dofir gelueft gëtt, ganz kloer. Mee ech betruechten esou Präisser och ëmmer kritesch, well dat och subjektiv Choixe sinn."