CinEast-Festival De Mënsch, dëst onnatierlecht Wiesen

Déi ungaresch-rumänesch Produktioun "Spiral" vun der Cecília Felméri weist, datt d'Mënsche sech net einfach de Gesetzer vun der Natur kënnen iwwerloossen. Aus der Kompetitioun vum CinEast-Festival.

Michel Delage

Filmkritik Spiral
Dem Biolog Bence (Bogdan Dumitrache) säi Weier ass erfruer ewéi seng Bezéiung

Eng Koppel lieft bei engem Weier, matzen an der Natur. De Bence (Bogdan Dumitrache) ass Biolog. Hien ziicht Welsen, mam Zil, hiert Verhale kënnen ze studéieren. Seng Frëndin Janka (Diána Magdolna Kiss) ass net zefridde mat deem isoléierte Liewen a géif léiwer nees als Enseignante an enger Stad schaffen. Nodeems d'Fra enges Daags engem Ongléck zum Affer fält, muss sech de Mann komplett a Fro stellen.

Déi éischt Opnam vu ''Spiral'', dem Debutfilm vun der Ungarin Cecília Felméri, hëlt de Schicksalsschlag virewech: esou wéi d'Natur ronderëm de Weier sech am Waasser erëmspigelt, gëtt dem Biolog säi Liewen op d'Kopp gehäit. Mee wéi geet et weider? En neien Ufank? Eng Form vu Kontinuitéit? A kann ee weiderliewen, wéi wann näischt geschitt wier, d'Vergaangenheet hanner sech loossen, se vergiessen?

Zesummespill mat der Natur

Äntwerten op déi Froe liwwert de Film an enkem Zesummespill mat der natierlecher Kuliss, dem Zyklus vun de Joreszäiten, der Reproduktioun vun de Liewensformen.

D'Ongléck mat der Frëndin geschitt am Wanter, zu engem Moment, wou d'Bezéiung net méi déi allerbescht ass, iergendwéi erfruer ass, wéi d'Waasser um Weier. D'Bild vum Mann, dee mat der Motorsee d'Äis opbrécht, kéint als symbolesche Versuch interpretéiert gi fir d'Relatioun nees opliewen ze loossen.

Sech am Zyklus vun der Natur opléisen?

Nodeems et him net gelongen ass, weder d'Bezéiung nach seng Frëndin um Liewen ze halen, setzt de Biolog op dat, wat hien am beschte kennt, nämlech d'Mechanisme vun der natierlecher Reproduktioun, esou wéi hien dat och mat de Fësch mécht. Der Fra hire Kierper gëtt der Natur iwwerlooss.

An et schéngt ze wierken: esou wéi d'Fréijoer de Weier nees entdeeën an de Bësch opbléie léisst, esou daucht op eemol eng nei Fra (Alexandra Borbély) op, mat där de Bence och séier wäert zesummeliewen, genee esou wéi virdrun, wéi wann näischt gewiescht wier.

De Mënsch ass awer e spezifescht Wiesen

Mee am Géigesaz zur Natur huet de Mënsch e Gewëssen. De Bence ka sech net an der Natur opléisen. Hie verspiert Widderstänn, zum Beispill refuséiert hien, déi aus dem Weier gefëschte Welsen ze iessen, déi seng nei Frëndin gekacht huet. Hei spillt den anthropologesche Verbuet vum Kannibalismus. A virun allem: seng verstuerwe Frëndin ass net einfach esou ze ersetzen.

Dat mënschlecht Liewe kann och net einfach eng permanent Géigewaart sinn, een Zyklus, dee sech praktesch onendlech widderhëlt. De Biolog lieft mat der Lascht vun der Vergaangenheet um Bockel. Déi knallrout Boje an der Mëtt vum Weier, dem zentrale Fixpunkt, deem eenzege vun deem aus ee genuch Handysreseau huet fir mat der Baussewelt ze kommunizéieren, ass do fir ëm dat zu all Moment an Erënnerung ze ruffen.

Et ass wéi d'Spiral aus dem Filmtitel: entweder gëtt ee vun hirem Zentrum verschlongen, oder et fënnt een de Wee eraus.

''Spiral'' ass e rouege Film, deem seng Handlung, Erzielweis a Personnagen enk mat der Natur verflecht sinn. D'Aart a Weis, wéi den Haaptprotagonist op den Doud vu senger Frëndin reagéiert, ass vläicht an Aklang mat den natierleche Prozesser. Mee op de Spectateur wierkt dat verstéierend, suergt fir Desorientéierung. D'Kraaft vum Film besteet doranner, datt en op dat hindeit, wat de Mënsch zu engem spezifesche Wiese mécht.


*Spiral" leeft nach dëse Mëttwoch 21. Oktober um 20.45 am Utopia an Donneschdeg 22. Oktober um 18.30 an der Cinemathéik, respektiv ass online um Site vum CinEast-Festival ze gesinn.

An der Mediathéik:

Kultur / / Michel Delage
Lauschteren

Méi zum Thema

Samuel Skyva a Samuel Polakovic Filmkritik
CinEast-Festival

Subversiv Aktivitéiten an engem Seminaire ënner dem Kommunismus: den Drama "Servants" vum Slowak Ivan Ostrochovsky beandrockt net nëmmen duerch seng Bildästheetik. Kompetitioun CinEast-Festival.

Father - Otac Filmkritik
CinEast-Festival

En aarmen Doléiner kämpft ëm d'Garde vu senge Kanner. De serbeschen Drama "Father" ass eng Bestandsopnam vum desastréise sozio-ekonomeschen Zoustand vu Serbien. Aus der Kompetitioun vum CinEast-Festival.

Charlatan Filmkritik
CinEast-Festival

De populären tschecheschen Heilpraktiker Jan Mikolasek geréit an d'Viséier vun de Kommunisten. ''Charlatan'' ass en zolitte Biopic vun der renomméierter polnescher Regisseurin Agnieszka Holland.

MARE_still_6.png Filmkritik
CinEast-Festival

Den Drama ''Mare'' vun der Kroatin Andrea Staka erzielt d'Geschicht vun enger frustréierter Hausfra déi versicht, der Alldagsroutine ze entkommen. Aus der Kompetitioun vum CinEast-Festival.

Stories from the chestnut woods Filmkritik
CinEast-Festival

D'Ëmbrëch op der italieenesch-jugoslawescher Grenz nom Zweete Weltkrich ware fir vill Mënschen d'Enn vun enger Welt. Dovun erzielt de slowenesche Film "Stories from the chestnut woods''.

Willow Filmkritik
CinEast-Festival

Dräi Fraen an hir Schwieregkeeten, fir schwanger ze ginn. Dat ass de Sujet vum Milcho Manchevski sengem neie Film "Willow". Um CinEast lafen dräi Wierker vum mazedonesche Realisateur.

Drita'' vum Daniel Kruglikov Filmkritik
CinEast-Festival

Kann den Zyklus vun der Vendetta gebrach ginn? De kosovaresch-amerikaneschen Drama ''Drita'' vum Daniel Kruglikov ass e strengt, poetescht Wierk. Aus der Kompetitioun vum CinEast-Festival.

Programm

Net verpassen

  • Nei Serie: poesik

    jr-korpa-GQeSfSWmXvI-unsplash.jpg

    Dem Jean Portante seng nei Serie stellt Kompositiounen a Lidder vir, Wierder a Kläng, déi der Weltpoesie eng nei Dimensioun ginn a se dem Publikum méi no bruecht hunn.

Dossieren

  • CinEast-Festival 2020

    De CinEast-Festival weist eng Selektioun vu mëttel- an osteuropäesche Filmer. Déi 13. Editioun ass wéinst der Covid-Pandemie eng hybrid: d'Filmer gi souwuel um groussen Ecran wéi och online gewisen.

  • AutorInne-Lies

    D'Publikatioun PM 19 10 huet d'Valerija Berdi inspiréiert fir déi akustesch Athmospär fir d'Buch ze liwweren. Hatt huet sech dofir op de Wee gemaacht an eng ganz Rei Andréck bei Autorinnen an Auteuren doheem akustesch agefaangen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen