Immersiv, explorativ, kontemplativ - Dem Georges Lentz seng nei Produktioun
Grouss Landschaften, extreem Wiederbedingungen an eenzegaarteg Déieren ...esou kann een den australeschen Outback beschreiwen. Wann ee sech dës Landschaft virstellt, begräift een och direkt déi atmosphäresch Spannung vum Georges Lentz senger neister Produktioun.
Dës Klangwelt entsteet net nëmmen duerch analog Instrumenter vu "The Noise String Quartett", mee och duerch digital Kläng, déi de Komponist um Computer provozéiert.
“Amitié musicale à quatre mains”
Wéi den Titel vum Album et scho verréit, sinn d’Pianistin an de Pianist vun dësem Album net nëmmen en Team, wann et ëm d’Musizéiere geet, mee och soss ganz gutt Frënn. D’Marie François an de Simon Adda-Reyss trieden allen zwee weltwäit op Concerten op an hunn elo hiren éischte gemeinsamen Album erausbruecht. De Cover ass ganz kënschtleresch. Dorop gesäit ee véier Hänn an d’Fangere sinn zimmlech laang a ganz flexibel, sou datt ee bal mengt, nëmmen zwou Hänn ze gesinn amplaz vu véier. Dat Bild passt gutt bei den Album, well déi zwee spillen esou verbonne mateneen, datt ee bal menge géif, et géif nëmmen eng Persoun um Piano sëtzen. D’Resultat ass eng ganz intim Interpretatioun, déi d’Musek nëmmen nach méi magesch mécht.
Your musical afterwork - Kreativ an de Feierowend
D’Martina Menichetti ass eng Allrounderin: Flüttistin, Pianistin, Songschreiwerin, Produzentin an och am edukative Beräich aktiv. An der Philharmonie huet si eng Partie Projeten an Atelieren entwéckelt, dorënner en neit Format: de Musical Afterwork.
Dobäi geet et drëms, wéi een no engem laangen, ustrengenden Aarbechtsdag mat Hëllef vun der Musek de Kapp nees fräi kritt an nei Energie tankt.
