Ass dem Franz Schubert seng 8. Sinfonie, besser bekannt ënner dem Bäinumm "Die Unvollendete", dann elo wierklech "unvollendet"? Bis haut splécke sech do d'Meenungen, kee weess et esou richteg. Mee eppes ass kloer, de Schubert war der deemoleger 4-sätzeger Traditioun ganz no. Am Plausibelste bleiwe wuel d'Aussoen, datt hien d'Wierk entweder fir aner Opträg opginn huet oder déi aner zwee Sätz einfach bis haut verschwonne sinn. An iergendwou dréit grad dëse Mysterium ronderëm dat Stéck jo och bis haut e bëssen zu sengem Succès bäi.
Am Joer 1870, op Chrëschtdag Mueren, wollt de Richard Wagner seng Fra Cosima fir hire Gebuertsdag mat der Uropféierung vu sengem neiste Wierk "Siegfried Idyll" iwwerraschen. Kuerzerhand huet et e Kammerorchester am Trapenhaus vun hirer Villa fir d'Cosima gespillt: si ass vun den Orchesterkläng quasi aus dem Schlof erwächt ginn. An zu dëser immens romantescher Zeen passt dann och den Original Titel vum Wierk: "Tribschener Idyll mit Fidi-Vogelgesang und Orange-Sonnenaufgang, als Symphonischer Geburtstagsgruss. Seiner Cosima dargebracht von Ihrem Richard." Wat dëst alles bedeite soll, ënner anerem dat verréit Iech de Jeremy Ney an dësem Concert.
Franz Schubert (1797-1828):
• Sinfonie No. 8 a Si mineur, D. 759 ("Die Unvollendete")
Richard Wagner (1913-1883):
• Siegfried Idyll
Maurice Ravel (1875-1937):
• Tzigane
Interpreten:
• Henrik Naimark Meyers, Gei
• Swedish Radio Symphony Orchestra
• Maxim Emelyanychev, Direktioun
