No engem éischter fréie Wierk vum Wolfgang Amadeus Mozart, seng 14. Sinfonie, déi hie mat nëmme 15 Joer no senger zweeter Italierees geschriwwen huet, woe mir direkt e Sprong an d'20. Joerhonnert an op déi aner Säit vum grousse Pull.
Dem Aaron Copland säi Klarinette-Concerto, geschriwwen tëschent 1947 a 1949, ass en Optragswierk vum Klarinettist Benny Goodman. Stilistesch huet de Copland eng ganz Rei Jazzelementer agebaut. Seng musikalesch Signature, déi hie selwer als "bittersweet lyricism" beschreift, ass, esou seet hien, senge Gefiller vu sozialer Ofgrenzung duerch seng Homosexualitéit geschëlt.
No dësem Concerto dauche mir nach eemol an dem Mozart seng Sinfonien an, dës Kéier mat senger 36., och nach bekannt ënner dem Numm "Linzer Sinfonie". Wéi den Numm et verréit huet hien dëst Wierk bei engem Stopp vun nëmme 4 Deeg an der Stad Linz komponéiert.
Zum Ofschloss komme mir da bei eng ganz aner Sinfonie: dem William Grant Still seng "Afro-American Symphony". Dës Sinfonie huet e ganz besonnesche Stellewäert: et war déi éischt Sinfonie vun engem afroamerikanesche Komponist, déi vun engem etabléierten US-amerikaneschen Orchester uropgeféiert gouf. Dës Sinfonie aus dem Joer 1930 verbënnt Blues-Elementer an déi deemools typesch afroamerikanescher Rhythmik mat den traditionell sinfonesche Formen.
Opgeholl gouf dëse Concert am Grousse Sall vun der Alten Oper zu Frankfurt an Dir kënnt en nach ee Mount laang an der Mediathéik vum Opus 100,7 nolauschteren.
Programm:
Wolfgang Amadeus Mozart (1756-1791):
• Sinfonie Nr. 14 a La Majeur, K. 114
Aaron Copland (1900-1990):
• Klarinette Concerto
Wolfgang Amadeus Mozart:
• Sinfonie Nr. 36 an Do Majeur, K. 425 ("Linz")
William Grant Still (1895-1978):
• Afro-American Symphony
Interpreten:
• Martin Fröst, Klarinett
• HR-Sinfonieorchester
• Riccardo Minasi, Direktioun
