Eng Arie soll esou op hir Sängerin zougeschnidde sinn, wéi e gutt geschneiderte Rack: esou kéint een de Wolfgang Amadeus Mozart zitéieren, wann hien iwwer seng Abberzuel un Operarien schwätzt. Sief et déi ausschwäifend Concertsarie "Ah, lo previdi", déi et ëmmerhin op bal eng Véirelstonn Musek packt, oder der Grofin Rosina hir Arie "Dove sono i bei momenti" aus dem bekannten "Le nozze di Figaro" bis zu enger Elektra-Arie aus dem "Idomeneo": bei dësem Concert kritt een e bësse vun all deem. Deem entgéint stellt sech e groussen Numm aus der russescher Héichromantik: den Nikolai Rimsky-Korsakov. Kaum e Wierk erfreet sech esou enger Beléiftheet wéi seng Orchestersuite iwwer d'Erzielunge vun "Dausend an enger Nuecht", d'Stéck "Scheherazade". Eng opulent a faarweg Orchestratioun mëscht sech hei mat Stilelementer aus der orientalescher Kultur, eng Faszinatioun, déi sech zum Enn vum 19. Joerhonnert iwwerall ënner de Kënschtler a Komponiste breetgemaach huet.
Dëse Programm gëtt interpretéiert vun der däitscher Sopranistin Hanna-Elisabeth Müller zesumme mam Sinfonieorchester des Hessischen Rundfunks. Um Dirigéierpult steet den Alain Altinoglu, e franséischen Dirigent mat armeeneschen Originnen. Opgeholl gouf dëse Concert vum ORF am Kader vum Grafenegg Festival am Wolkenturm vu Grafenegg an Dir kënnt e bis den 3. August 2025 an der opus-Mediathéik nolauschteren.
Programm:
Wolfgang Amadeus Mozart (1756-1791):
• Ouverture aus "Die Entführung aus dem Serail"
• "Ah, lo previdi", K. 272
• Ouverture aus "Le nozze di Figaro"
• "Dove sono i bei momenti", Arie vun der Grofin aus dem 3. Akt vun
"Le nozze di Figaro"
• "Oh smania! ... D'Oreste, d'Aiace", Arie vun der Elettra aus dem 3. Akt
vun "Idomeneo"
Johann Strauss (II) (1825-1899):
• "Csárdás", Arie vun der Rosalinde aus dem 2. Akt vun "Die
Fledermaus" (Encore)
Nikolai Rimsky-Korsakov (1844-1908):
• Scheherazade, Op. 35 (Sinfonesch Suite)
Claude Debussy (1862-1918):
• Clair de lune, aus der "Suite bergamasque" (Encore)
Interpreten:
• Hanna-Elisabeth Müller, Sopran
• Sinfonieorchester des Hessischen Rundfunks
• Alain Altinoglu, Direktioun
