Den Naturmusée verwalt déi national Datebank vun de Beobachtunge vu wëllen Aarten zu Lëtzebuerg. Aktuell ëmfaasst si méi wéi 5 Millioune Beobachtungen, déi aus enger ganzer Rei vu Quelle stamen - vun den historesche Sammlunge vum Musée bis zu Amateur-Naturalisten.
Vum 24. bis de 27. Abrëll 2026 kennt och Dir dozou bäidroen d’Biodiversitéit zu Lëtzebuerg besser ze verstoen. Dëst andeems Dir no wëllen Aarten, egal wou zu Lëtzebuerg, sicht a se mat der iNaturalist App dokumentéiert. Dës gratis App hëlleft Iech Planzen, Déieren a Champignonen ze bestëmmen, ze dokumentéieren a mat de Wëssenschaftler:innen ze deelen.
