D’Initiativ Senioren-Sécherheetsberoder a -Beroderinnen, funktionéiert no engem einfache Prinzip: Sécherheet duerch en Austausch op Aenhéicht. Hei gi fräiwëlleg Senior:innen geziilt geschoult, fir aner eelere Mënschen iwwer Sécherheetsthemen ze informéieren an ze sensibiliséieren – no bei de Mënschen, verständlech a mat Respekt.
D’Zil ass et, d’Sécherheetsgefill ze stäerken, Angscht ofzebauen a méi Vertrauen am Alldag ze erreechen.
Fir interesséiert Persounen organiséiert de GERO zesumme mat der Police Grand-Ducale den 11. November 2025 eng Informatiounsversammlung. Hei kann een sech, ouni Verpflichtung, iwwer d’Aufgaben an d’Roll vun engem Senioren-Sécherheets-Beroder informéiere kommen. Dir léiert gläichzäiteg Vertrieder:innen vun der Police, aktiv Fräiwëlleger an d’Equipe vum GERO kennen.
Wien dono interesséiert ass, huet d’Méiglechkeet, vu Januar 2026 un, eng Formatioun bei der Police ze maachen. Dobäi kritt een net nëmme Fach-Kenntnisser zu Preventiounstheemen mee och d’Méiglechkeet, sech mam nationale Preventiounsservice an engem Netzwierk auszetauschen.
D’Aufgaben si variéiert: Virträg a Veräiner oder Altersheemer, Gespréicher op Foiren oder Info-Stänn an och individuell Berodungen. Dat verlaangt virun allem Kommunikatiounsfreed, Oppenheet an Empathie – déi eege Liewenserfarung ass dobäi eng grouss Ressource.
Explikatioune mam Alain Brever, Direkter vum Gero Kompetenzzenter fir den Alter.
www.gero.lu
