All Joer organiséiert de GERO, op Initiativ vum Familljeministère, d’Journée internationale des personnes âgées - den internationalen Dag vun den eelere Leit. Fir d’Editioun 2025 steet d’Theema Noperschaft am Mëttelpunkt, ënner dem Motto: E klenge Gest, e grousst Laachen - Léiert Ären Noper oder Är Nopesch (besser) kennen.
D’Iddi ass einfach a sympathesch: et gëtt eng speziell Postkaart ausgefëllt a se an d‘Bréifkëscht vum Noper geheit. Esou gëtt deen éischte Schrëtt op d‘Noperschaft hi méi einfach, och fir Mënschen, déi net esou vill sozial Kontakter hunn - e Phenomeen, dee mam Alter dacks zouhëlt. D’Campagne soll dozou bäidroen, datt méi Hëllef, Austausch an Zesummenhalt an de Quartieren entsteet.
Am Géigesaz zu verschiddenen Onlineplattforme wéi hoplr.lu, wou d‘Interaktioun komplett digital leeft, ass dës Initiativ bewosst ouni Internet-Kenntnisser ëmzesetzen. Jidderee ka matmaachen - et brauch ee just eng Postkaart, e Stëft an e klenge Moment Zäit. D’Kaart kann een entweder op www.jipa.lu eroflueden oder eng gedréckte Versioun huelen.
Kleng Gesten - wéi eng Invitatioun op e Kaffi, eng Offer fir Hëllef oder einfach häerzlech Gréiss - kënnen e grousse positiven Impakt hunn.
Esou gëtt den 1. Oktober 2025 net nëmme gefeiert, mee och konkreet gelieft: duerch méi Mënschlechkeet an e bessert Zesummeliewen an eiser Noperschaft. Explikatioune mam Alain Brever, Direkter vum Gero Kompetenzzenter fir den Alter (www.gero.lu)
