Am Kader vum Projet DEEMOOLS sichen d‘Organisateuren aktuell motivéiert Fräiwëlleger, déi bereet sinn, hir Zäit a Passioun anzebréngen, fir eng wichteg kulturell an historesch Initiativ ze ënnerstëtzen. De gemeinsame Projet, vum Naturpark Uewersauer, dem Kompetenzzenter fir den Alter GERO, der Universitéit Lëtzebuerg an dem C²DH (Luxembourg Centre for Contemporary and Digital History), huet zum Zil, lieweg Erzielungen a perséinlech Erënnerungen aus verschiddenen Zäiten a Liewensberäicher opzehuelen a festzehalen.
Déi Geschichten, déi am Kader vum Projet gesammelt ginn, decken eng grouss thematesch Vilfalt of: vum gesellschaftleche Wandel iwwer d‘Liewen an der Stad oder um Land, bis hin zu perséinleche Momenter ronderëm Léift, Famill a Gemeinschaft. D’Zäitzeien, déi hir Erënnerungen deelen, droen esou dozou bäi, datt wäertvoll Stécker vun eiser kollektiver Geschicht erhalen an un zukünfteg Generatioune weidergi ginn.
D’Roll vun de Fräiwëllegen, déi d’Interviewe féieren ass dobäi besonnesch wichteg: si féiere Gespréicher, lauschteren no, hëllefe bei der Opnam an dokumentéieren d’Geschichten op respektvoll an empathesch Aart a Weis. Den Alain Brever Direkter vum Gero Kompetenzzenter fir den Alter huet weider Detailer oder méi Informatiounen iwwer de Projet, an online op www.gero.lu.
