Luxembourg on the Rocks - Wéi Geschicht a Geschichten aus Steen entstane sinn.
D'Expo mat engem ganz interessante Kaderprogramm ass bis de 16. Mäerz 2025 ze gesinn.
Wéi sinn eis Landschaften a hir Fielsënnergrënn entstanen? A senger geologescher Sektioun weist d'Ausstellung, wéi d'Mier eise Sandstee viru Millioune vu Joer zeréckgelooss huet a wéi eng aner Gestengsformatiounen, wéi Schifer oder Eisenäerz, eist jëtzegt Lëtzebuerg prägen.
Den natur musée weist an engem Modell a mat historeschen Dokumenter, wéi déi eenzegaarteg geologesch Situatioun vun der Stad eng Festung erméiglecht huet, déi bis an 19. Joerhonnert ausgebaut gouf. Mat der Schleefung vun der Festung no 1867 gouf se selwer nees zu enger Zort Steebroch fir d'Vergréisserung vun der Stad Lëtzebuerg.
Net nëmmen an der Architektur spillt d’Material Steen eng wichteg Roll an eisem Alldag an och a villen alldeeglechen Objeten. Porzeläin, Keramik, Glas a Besteck sinn all vu mineralescher Hierkonft!
Net zulescht ass de Stee liewenswichteg: Drénkwaasser a Liewensmëttel enthale Spuerenelementer, déi aus dem Steen a Buedem absorbéiert ginn. Mikroorganismen, Deiere a Planze liewe souguer déif am an um Steen. An neit Liewen entsteet, wou eemol Steen ofgebaut gouf, wei zum Beispill an den Terres Rouges.
Explikatioune mat der Geologin Kim Totaro, an dem Konscht- a Kulturhistoriker Hans Fellner (www.naturmusée.lu)
