An der Musekszeen konnt d’FKA Twigs och scho vill Erfolleg feieren, mat ënnerschiddlechen Auszeechnungen. Och wann den Album CAPRISONGS vun 2022 méi kommerziell war, si mer elo rëm bei der experimenteller Musek zeréck, wat vläit manner zougänglech fir déi breet Mass ass, dowéinst awer méi ausprobéiert an och influenzéiert.
EUSEXUA
Ausschlaggebend bei dësem Album ass eng néi Gefillslag, woufir d’FKA Twigs och e ganzt neit Wuert erfonnt huet: EUSEXUA. Wat heescht dat genau? Et ass schwéier eng konkret Definitioun festzeleeën, mee am allgemengen heescht et Léift, transzendental Euphorie a Fräiheet am breede Sënn. Et ass eppes ganz Perséinleches, mee wann ee wierklech ganz sech selwer ass a present am Moment, da fillt een EUSEXUA.
Ikon
D’Kënschtlerin FKA Twigs zeechent sech och aus, well et sech hei net just em eng Musekerin handelt, mee wierklech em eng Artistin. Si mécht niewent der Musek och Schauspill, ass eng professionell Dänzerin, huet eng ganz spezifesch Ästhetik, wouduerch si och vill Influenzen an der Moud hautzedaags huet, an ass allgemeng an der kreativer Zeen immens engagéiert. Och an hire Museksvideoe gesäit een de Fläiss an d’Suerg, déi bei der Ästhetik matspillt: et ass kloer Performance-Konscht.
Rave
Immens inspiréiert vun der europäescher Rave-Zeen, luet den Album an ze danzen, mee sech dobäi och komplett falen ze loossen. Textlech ginn déi ënnerschiddlech Aart a Weisen erkläert, wei een EUSEXUA erreeche kéint, mee dat ass bei dësem Album net de Schwéierpunkt. Dat ass hei kloer d’Produktioun; an d’Gefiller ginn och iwwert d’Musek riwwer bruecht, well elektronesch Musek funktionéiert och just wierklech gutt, wann do Gefiller matspillen. Deementspriechend: danzen, net nodenken, sech goe loossen, fillen, EUSEXUA!
