1. Mat engem ambitiéisen Energie- a Klimaplang wëllt d'Regierung géigesteieren, e ganze Pak u finanzielle Mesuren soll den Ausbau vu Photovoltaik-Anlagen ënnerstëtzen. Parallel soll d'CO-Tax schrëttweis erhéicht ginn
2. Den 8. Mee sollen d'Eisebunnslinnen Ettelbréck-Kautebaach respektiv Kautebaach-Wolz nees opgoen, dat huet de Mobilitéitsminister François Bausch gëschter confirméiert. Fir d'Reouverture vun der Streck Kautebaach-Klierf, wou en Tunnel agefall war, gëtt et nach keen Datum
3. De Prozess Lunghi-RTL gouf op en Neits verluecht: Ee vun den Ugeklote konnt wéinst gesondheetleche Grënn net derbäi sinn, hien insistéiert awer fir seng Ausso viru Geriicht ze maachen. De Prozess hat Enn Februar scho misse verluecht ginn, well en Affekot gesondheetlech Problemer hat
4. En Appell u China sech un international Reegelen ze halen an un de Sudan d'Gewalt am Land direkt ze stoppen: D'G7 Staaten hu gëschter a Japan e Schlussdokument verëffentlecht. Et ass een och zu weidere Sanktioune géint Russland bereet
5. D'Rentereform war inevitabel, soss wieren d'Renten erofgaangen oder d'Cotisatiounen erop, esou de franséische President Emmanuel Macron gëschter a senger Televiounsried. Hien huet versprach op d'Patronen an op d'Gewerkschaften duerzegoen
6. Plainte géint Taxonomie: Verschidden Ëmweltorganisatioune kloen virum Europäesche Geriichtshaff géint d'Aklasséiere vu Gas an Atomenergie als nohalteg Energieformen. Och Éisträich a Lëtzebuerg haten eng Plainte géint déi sougenannt EU-Taxonomie agereecht
7. Am Bundesstaat Missouri an den USA gouf elo ee 85 Joer ale Mann ugeklot, hien hat duerch eng Dier op e jugendlechen Afroamerikaner geschoss, well deen iertemlecherweis u senger Dier geschellt hat. Dee 16 Joer ale Bouf gouf liewensgeféierlech um Kapp blesséiert
8. An der Fussball Champions League sinn haut d'Retourmatcher vun de Véierelsfinallen, Chelsea spillt géint Real Madrid a muss en 2-0 Retard ophuelen, Neapel trëfft op AC Mailand, Mailand hat hei am aller Match 1-0 gewonnen