Gezeechent - d'BD vum Mount
Guy Delisle - Chronique de jeunesse
"Chroniques de jeunesse" ass en autobiographesche Comic, mee alles anescht wéi eng typesch Jugenderzielung. De Guy Delisle beschränkt sech nämlech op dräi Joer an de fréien Achtzeger, an deenen hien an de Summervakanzen an enger Pabeierfabrick zu Québec geschafft huet. D'Bande dessinée besteet aus enger detailléierter Beschreiwung vum Mikrokosmos vun där Fabrick, an déi den Zeechner eis mat sengen einfachen, bal monochromen Zeechnungen, déi ëmmer no um Cartoon sinn, eraféiert.
Hei gesäit een direkt de journalistesch-dokumentareschen Aspekt, deen typesch fir de Guy Delisle ass. "Chroniques de Jeunesse" geheit e Bléck an d'Geschicht vun der Fabrick, beschreift d'Aarbecht ganz konkret an erzielt vill vun de Leit, déi do schaffen. Den Delisle erweist sech als soziologesche Feldfuerscher, deen de Fabricksmilieu - zum Beispill d'Rivalitéit tëschent den Aarbechter an den Ingenieuren - aus der Perspektiv vum hallwen Aussesäiter beobachtet. Esou ass d'Bande dessinée och e Portrait vun enger aler, männlech dominéierter industrieller Aarbechtskultur, déi haut net méi dee selwechte Stellewäert huet, ouni datt se nostalgesch verkläert gëtt.
Niewent deem journalistesch-dokumentareschen Aspekt gëtt et awer och nach ee méi perséinlechen. De Grond, firwat de Guy Delisle iwwerhaapt an de Summervakanzen an där Pabeierfabrick schafft, ass deen, datt säi Papp do als techneschen Zeechner beschäftegt ass. D'Eltere si gescheet, den Delisle lieft bei senger Mamm, an hie mierkt, datt d'Aarbecht an der Fabrick och eng Méiglechkeet ass, dem Papp méi no ze kommen. De Papp bleift awer ëmmer op Distanz, leeft dacks just iergendwou am Hannergrond duerch d'Halen, bal wéi e Geescht, deen an der Fabrick haust.
Et ass sécherlech eng Enttäuschung a eng Frustratioun doriwwer beim Protagonist ze spieren, mee souguer an deene Momenter, wou d'Bande dessinée méi introspektiv gëtt, bleift se an hirer Duerstellung ganz lakonesch a subtil. Grad an der Aart a Weis, wéi se dat Dokumentarescht mat deem Autobiographesche verbënnt, ass "Chroniques de jeunesse" wierklech gelongen, en accessibelt a kuerzweilegt Buch, dat trotzdeem vill Déifgang bitt, fënnt de Jeff Thoss.
Episoden
Grouazel/Locard - Révolution, II. Égalité
Matten an der Geschicht: 2019 hunn de Florent Grouazel an de Younn Locard den éischte Band vun hirer Trilogie iwwer d'Franséisch Revolutioun erausbruecht. Elo koum d'Suite eraus.
Liv Strömquists - Astrologie
Déi schweedesch Zeechnerin ass duerch hir feministesch Essaien bekannt ginn. An hirem neiste Comic beschäftegt si sech mat engem iwwerraschende Sujet: der Astrologie.
Lewis Trondheim - 31 juillet
Deen aachte Band vun enger Serie mam Titel "Les nouvelles aventures de Lapinot", mee et muss een näischt doriwwer wëssen, fir dës kuerz BD mat 56 klengformatege Säiten ze liesen.
Deena Mohamed - Your Wish Is My Command
E modernt Märchen aus Ägypten vun enger ägyptescher Zeechnerin Deena Mohamed, dat mat an e modernt Kairo hëlt.
Stockhausen - "Der Mann, der vom Sirius kam"
D'Liewe vum Karlheinz Stockhausen als Comic. Am Zentrum steet d'Faszinatioun déi den Auteur vu senge fréien Teenagerjoren u mat der Musek vum Avantgarde-Komponist hat.
Eva Müller - Scheiblettenkind
Iwwer d'Opwuessen an enger däitscher Aarbechterfamill a dovun, wéi Klassementalitéit a sozial Ënnerscheeder d'Heldin hiert ganzt Liewe laang begleeden a beschäftegen.
Jean-Marc Rochette - La Dernière Reine
Zeréck zur Natur: Eng Koppel stemmt sech an den Alpe vum fréien 20. Joerhonnert géint de Fortschrëtt a wierkt an hirer Anti-Modernitéit heiansdo ganz modern.
Kate Beaton, Ducks: Two Years in the Oil Sands
En autobiographescht Wierk iwwer der Kënschtlerin hir Zäit an der kanadescher Uelegindustrie an déi sëllege Forme vun Exploitatioun, déi si do erlieft huet.
Bastien Vivès - Dernier week-end de janvier (Casterman)
Eng Léift um Comicfestival: dem Bastien Vivès seng neiste BD erzielt mat spuersame Mëttele vun enger onwarscheinlecher Libesgeschicht am Comicmilieu, déi sech bal net ze erkenne gëtt.
Hamed Eshrat - Coming of H
Kiffen a Sprayen an der Provënz: eng Migratiounsgeschicht mat der Geschicht vun enger Jugend an den 1990er Joren. Souverän erzielt, awer ouni grouss Iwwerraschungen.
Pierre-Henry Gomont, Slava, 1: Après la chute
De Pierre-Henry Gomont hëlt eis mat zeréck an d'Russland vun den Nonzeger, wou de Kommunismus grad zu Enn gaangen ass a sech d'Gesellschaft nei organiséiert.
Quentin Zuttion, La Dame blanche
En originelle Bléck op d'Aarbecht am Altersheem: De Quentin Zuttion huet sech an de leschte Jore mat sensibele Bicher zu aktuellen Theemen en Numm gemaach.
Birgit Weyhe, Rude Girl
E Liewen tëschent Baseball, Ska a Brecht: eng faszinéierend Biografie mat spillereschen Iwwerleeungen zum Theema Representatioun
Zep - Ce que nous sommes
Just e Gehier an engem Tank? Gutt gezeechent, awer ganz konventionell Science Fiction
Elizabeth Holleville - Immonde!
Den Horror lauert an der Industriezon: An hirer zweeter BD erzielt d'Elizabeth Holleville vun dräi Teenageren, déi komesche Virfäll an enger klenger elsässescher Industriestad noginn.
Aisha Franz - Work-Life-Balance
A hirer véierter Graphic Novel setzt sech d'Zeechnerin op witzeg a bësseg Aart a Weis mat der moderner Aarbechtswelt auserneen an hire Problemer.
Héctor Germán Oesterheld/Alberto Breccia/Enrique Breccia - Life of Che
En argentinesche Bléck op den Che Guevara
Lara Swiontek - Verwandlung
Ee Märche fir Erwuessener, déi éischt Graphic Novel vun der däitscher Kënschtlerin an Illustratorin
David Sala - Le Poids des héros
Dat neit Wierk vum franséischen Zeechner geet nees an eng éischter literaresch Richtung. Et ass e Familljeportrait vum Auteur, vu senger Kandheet a Jugend.
