Se si kuerz a knackeg a komplett verschidden. Zwou Mini-Serië mat Episode vu jeeweils véier bis sechs Minutte stinn am Fokus.
Déi éischt Serie dréit den Titel: "Tu préfères" op Däitsch "Würdest du eher". D'Djeneba, d'Shai, den Ismaël an den Aladi si 16 Joer al a wuessen op an engem populäre Quartier vu Paräis.
Déi véier si matten an der Pubertéit an zéie sech gäre géigesäiteg mat engem Spill op, dat doraus besteet sech absurd Froen ze stëllen, déi en Dilemma duerstellen. Wéi zum Beispill: Häss de léiwer keng Been oder keng Äerm? Häss de léiwer en Job, deens de gäre méchs mam Mindestloun oder e schäiss Job, an dofir 10.000 Euro pro Mount? Et ass duerch dëst Spill, wou si sech mat Theemen auserneesetzen, déi fir si an hirer Pubertéit grad wichteg sinn.
Déi zweet Serie kéint aneschters net sinn. Si heescht "Chroniques végétales" op Däitsch "Kräuter-Geschichten". Och hei ginn et zéng Episoden, déi awer net méi laang si wéi véier Minutten.
An deene puer Minutte gëtt all kéiers de Portrait vun enger Kraiderplanz gezeechent, déi een deelweis kennt, mee awer och iwwersäit. Zum Beispill d'Brennnessel, d'Pissblumm oder de Borretsch.
Et gëtt erzielt, wou d'Planzen hierkommen, firwat se esou heeschen an natierlech awer och firwat se gutt sinn, wat ee wéi vun hinne benotze kann. Dës Serie ass net nëmmen interessant, well se immens informativ ass, mee och well se flott realiséiert ass.
D'Serien "Tu préfères" a "Chroniques végétales" sinn op verschidde Sproochen an der Arte Mediathéik ze gesinn.
