Zwou Lëtzebuerger Dageszeitungen thematiséieren den Aviatiounssecteur haut grouss op hiren éischte Säiten: "Angst um Arbeitsplätze", esou d'Schlagzeil vum Lëtzebuerger Wort. An "Anleitung zum Durchstarten", dat ass den Titel, deen de Lëtzebuerger Journal gewielt huet, am Virfeld vun der sektorieller Tripartite vun haut.
D'Loftfaart-Branche géif an enger déiwer Kris stiechen, esou de Journal. Déi sektoriell Tripartite vun haut, soll de Wee aus den Turbulenze festleeën. D'Normaliséierung wäert Joren daueren.
Schwéier erwëscht hätt et och de Grupp Luxair: dem Lëtzebuerger Journal no, wier eng nei Strategie fir d'Gesellschaft néideg.
Dem Lëtzebuerger Wort no, géif wéineg geflu ginn, vill Fligere stéingen u Buedem. An dësen Zoustand kéint nach laang daueren.
E Sozialplang hätt bis elo nach keng vun den dräi Gesellschafte Luxair, Cargolux a Luxairport ugekënnegt, an dat soll och esou bleiwen. Wann néideg, misst de Staat intervenéieren, esou gëtt d'OGBL-Vertriederin Michelle Cloos am Wort zitéiert. Et misst alles gemaach gi, fir datt et keng sozial Kris am Loftfaart-Secteur gëtt, seet d'Gewerkschaftlerin.