An den USA sinn et elo just nach 8 Deeg bis zum Waldag de 5. November 2024. Trotz de Sondagen, déi eng immens knapps Course fir d'Wäisst Haus annoncéieren, huet de republikanesche Kandidat an Ex-President Donald Trump fir een Dag déi sougenannt Swing States verlooss. Dat sinn déi 7 Staaten, wou dëst Joer entscheet gëtt, wien d'Presidence gewënnt: Den Donald Trump oder d'Vize-Presidentin Kamala Harris.
Trump: "Kamala, du bass entlooss"
Den Donald Trump huet a senger Heemechtsstad New York de berüümte Madison Square Garden mat sengen Supporter gefëllt.
D'Leit si vun no a vu wäit an dës Stad gereest, wou de republikanesche Kandidat onbeléift ass. Mee e ganzen Dag Walkampf gouf sacrifiéiert. D'Kamala Harris war zu Philadelphia, wou ëm all Vott gekämpft gëtt. D'Vize-Presidentin war an enger afroamerikanescher Kierch, an engem puerto-ricanesche Restaurant, an enger Schoul mat jonke Wieler:innen. Esou gewënnt een am kritesche Staat Pennsylvania.
Den Ex-President huet zu New York nees Massen-Deportatioune vun illegalen Immigranten, en Enn vun der Inflatioun, an eng besser a méi sécher Zukunft versprach.
“Nächsten Dënschdeg musst dir iech weisen an der Kamala Harris soen, datt si eng schrecklech Aarbecht gemaach huet, an datt de korrupten Joe Biden och eng schrecklech Aarbecht geleescht huet. Dir hutt eist Land zerstéiert, a mir akzeptéieren dat net mei. Kamala, du bass entlooss. Raus, raus.”
Op 7 Staate kënnt et un
Den Trump huet drop spekuléiert, datt säi Walmeeting zu New York genuch Medieninteressi a Contenu an de soziale Medie geschaaft huet fir seng Absence aus de Swing States ze kompenséieren.
Well déi nächst aacht Deeg ziele just nach am Norden d'Staate Wisconsin, Michigan, a Pennsylvania. Am Süden Nevada, Arizona, Georgia, an North Carolina.
An alle siwe Staate weisen d'Sondagen, datt et net méi knapp kéint sinn tëschent Trump an Harris.
D'Demokraten hunn de Verglach gemaach tëschent dem Trump sengem Walmeeting am Madison Square Garden an engem aneren Evenement, e Rallye vun amerikaneschen Nazien 1939, och am Madison Square Garden. E Verglach, deen d'Republikaner net akzeptéieren.