Trotz Restriktioune wéinst hirer Neutralitéit huet d‘Schwäiz d‘lescht Joer Waffen a Krichsmaterial am Wäert vun 948 Millioune Schwäizer Frang exportéiert - ronn 1 Milliard Euro.
Dat war eng Hausse vun 43 Prozent am Verglach zum Joer virdrun, esou dat Schwäizer Staatsekretariat fir Wirtschaft.
Däitschland gréisste Client - Lëtzebuerg bei den Haaptclienten
Bäi Wäitem dee gréissten Deel vun de Schwäizer Waffenexporter goung un Däitschland, mat ronn 386 Millioune Schwäizer Frang.
Déi aner Haaptclientë waren d‘USA, Ungarn, Italien a Lëtzebuerg.
Der Agence France Presse no huet Lëtzebuerg zejoert Waffen a Krichsmaterial vun der Schwäiz am Wäert vu 47,4 Millioune Schwäizer Frang kaaft - also ronn 53 Milliounen Euro.