Ënnert 15 Nominatiounen an der Kategorie “Audio-Investigatioun” vum europäesche Mediepräis Prix Europa huet de Jury zwou Produktiounen ervirgehuewen: D’Auszeechnung “Special Commendation” fir de Caritas-Podcast "Carambolage" am Zeenewiessel, an den Haaptpräis fir “Det Vita Snusets Baksida” vum schwedeschen ëffentlech-rechtleche Radio iwwert d’Hannergrënn vun der Industrie vun de sougenannte wäissen Nikotin-Pouches.
Am Ganze ware ronn 160 europäesch Produktioune fir de Prix Europa 2025 nominéiert ginn. An der Kategorie vun der beschter Audio-Investigatioun waren nieft den zwee Gewënner nominéiert:
- Le piège: Dans les coulisses du développement personnel (RTBF, Belsch)
- Falske Minder : Den Begravede Hemmelighed (DR, Dänemark)
- Le mystère du 27e trésor - Une restitution incomplète? (RFI, Frankräich)
- Sockenpuppenzoo - Eintragungs ins Nichts (SWR Kultur, Däitschland)
- Die Entfremdungslüge - Wie Rechte Netzwerke das Familienrecht unterwandern (Deutschlandradio, Däitschland)
- Die Flucht der Geschwister (rbb, Däitschland)
- Where is Jón? (RÚV an RTÉ, Island an Irland)
- Documentary On One - Osborn v Germany (RTÉ, Irland)
- La bambina numero 12 - L'incontro (Rai Radio 3, Italien)
- Justine, kuras nebija (Latvijas Radio, Lettland)
- Tamayazo (RTVE, Spuenien)
- Dödligt Damm (Sveriges Radio, Schweden)
- In dark corners - The list (BBC Radio 4, Groussbritannien)
De Prix Europa fir de beschte Journalist geet un de bulgaresche Journalist Christo Grozev. Hie gëtt fir seng investigativ Aarbecht ausgezeechent, ënnert anerem fir e fréiere Manager aus dem Wirecard-Skandal zu Moskau als russesche Spioun retracéiert ze hunn.
D'Liewen am Krich an der Gazasträif als bescht Video-Doku
De Präis fir déi bescht Video-Dokumentatioun ass fir “Life and Death in Gaza” vun der britescher BBC.
De Prix Europa ass eng Auszeechnung fir déi bescht europäesch Tëles- a Radiosproduktiounen vum Joer. D'Präisiwwerreechung ass ëmmer am Oktober zu Berlin a gëtt vun ëffentlech-rechtleche Medienhaiser organiséiert. Dëst Joer waren 162 Produktiounen an néng verschiddene Kategorien nominéiert. Fir d'éischte Kéier war och eng Produktioun aus Lëtzebuerg zeréckbehale ginn.
