2024 huet d’Krankekeess 54.000 Patiente Verhütungsmëttel an héicht vu 4,6 Milliounen Euro rembourséiert. Domat hu lescht Joer 10.000 méi Patiente vum Programm fir gratis Contraceptioun profitéiert wéi nach 2023, dem Joer wou de Programm agefouert gouf.
Och wann de fräien Accès op Verhütungsmëttel e wichtegen Deel vun der Famillje-Planung ass an dëse Programm e groussen Acquis duerstellt, wier dat eleng net genuch, observéiert d’Direktesch vum Planning Familial Céline Gérard. Mat der Gratis Contraceptioun wieren d‘Zuele vun Ofdreiwungen net erof gaangen a sexuell Iwwerdrobar Krankheete wiere geklommen.
Unzuel u Vasektomien huet sech verduebelt
Rembourséiert kritt een alles vun der Pëll iwwert Implantater bis zur Sterilisatioun. Dat meeschte Geld, nämlech ronn 5 Milliounen Euro, gouf an de leschten zwee Joer fir temporär hormonell Verhütungsmëttel rembourséiert.
Eng Ausnam si Kondomer, déi net rembourséiert ginn. Männer, déi aktiv verhüten wëllen, kréie just d’Vasektomie, also Sterilisatioun, rembourséiert. Vun 2023 op 2024 huet sech d’Zuel u Vasektomien op bal 900 verduebelt. Eleng lescht Joer hunn dës d’Krankekeess bal 700.000 Euro kascht. D’Waardezäite bis zu der OP dauere bis zu engem Joer.
De Planning Familial bedauert, datt Kondomer vum Remboursement ausgeschloss sinn. Kondomer wieren nach ëmmer déi beschte Method wiere, fir béid Geschlechter viru sexuell iwwerdrobare Krankheeten ze schützen, sou d’Direktesch vum Planning Familial.
Opklärung genau sou wichteg
Iwwerdeems erkläert d’Céline Gérard, datt den Accès op Verhiddungsmëttel awer nëmmen een Deel vun der Rechnung wier. Opklärung, dat heescht wësse wéi ee mat Verhütungsmëttel ëmgeet, wier genau sou wichteg wéi den Accès op d’Mëttel selwer.
De Planning familial stellt fest, datt den Accès an de Remboursement vu Verhütungsmëttel nëmmen dann eppes bréngen, wann d’Leit och iwwert hire gebrauch opgekläert sinn.