D’Stad géif haaptsächlech Politik fir déi Räich maachen, do si sech d’Vertrieder vun den Oppositiounsparteien eens. Dat géif ee virun allem an der Logementspolitik mierken. De Gabriel Boisante vun der LSAP freet sech, wou d’Versprieche vun der Koalitioun am Logement elo sollen ëmgesat ginn.
“Wou sinn déi héich Dépenses exceptionnelles fir de Logement, déi versprach gi sinn? Wou sinn déi 100 Millioune pro Joer? Wou sinn déi substanziell Ännerungen?”
Et géif un Initiativ feelen, fir vill méi ze bauen an d’Kris “an enger couragéiser Aart a Weis” unzepaken. A punkto Logement wier de Budget vun der Stad Lëtzebuerg ze eidel. Déi Mesuren déi de Staater Schäfferot decidéiert hätt wieren „éischt Kosmetik“.
Ronn 500 Milliounen Euro fir de Logement virgesinn
Et wier zwar eng positiv Entwécklung vun den Objets en location vun 920 op 986 an dräi Joer. Mee dat wieren eng 18 Wunnenge méi pro Joer um Locatiouns-Marché, an dat wier net genuch.
Mat engem Defizit vun 219 Milliounen Euro war de Budget ufanks der Woch vum schwaarz-bloe Schäfferot presentéiert ginn. Fir de Logement sinn am ganzen eng ronn 500 Millioune virgesinn. E Méindeg dann ass de Vott vum Stater Budget 2024.