Du interesséiers dech fir Medien, Journalismus, Kultur a Musek vu Lëtzebuerg? Du wéilts an deene Beräicher schaffen, weess awer net genee wat?
Mir siche kreativ Talenter, déi de journalisteschen Alldag vun engem Service public Medienhaus vu Grond op léieren.
De radio 100,7 sicht en/eng Kandidat:in fir e journalistescht Volontariat (Vollzäit)
Wat bidde mir dir?
24 Méint bezuelte crossmedial Ausbildung als Journalist:in an engem kreativen Ëmfeld, ëmgi vun enger dynamescher a motivéierter Ekipp. Du bass an déi alldeeglech Aarbecht um Radio agebonnen a léiers, wéi ee Berichter a Reportagë produzéiert, journalistesch Recherchë mécht an hanner dem Mikro schafft. Du léiers déi verschidden Deeler vum Radio kennen, vun der Animatioun, der Noriichteredaktioun iwwer d’Online-, d’Features-, d’Kultur- an d’Museksredaktioune bis bei d’Technik. Du gëss souwuel intern wéi och extern forméiert, hëls u Volontärcoursen am Ausland deel a gees Partner-Radioen an den Nopeschlänner besichen.
Deng Perspektiv:
De Volontariat gëtt dir den theoreeteschen a prakteschen Knowhow, fir am Journalismus an allgemeng am Mediesecteur ze schaffen. Du kriss d’Chance op eng laangfristeg Perspektiv an eiser Redaktioun.
Däi Profil:
Du begeeschters dech fir Lëtzebuerg an d’Mënschen, déi hei liewen. Du bass virwëtzeg an interesséiers dech fir Journalismus, dee gesellschaftlech relevant, kritesch an onofhängeg ass. Radio, Podcasten, Storytelling an déi digital Medie sinn deng Leidenschaft. Kreativitéit an Teamgeescht zeechnen dech aus.
Du beherrschs déi lëtzebuergesch Sprooch perfekt an hues gutt Kenntnisser am Däitschen, Engleschen a Franséischen. Am Beschten hues du e Schoulofschloss um Niveau Bachelor oder Master, an e Fürerschäin (Kategorie B). Du hues schonn éischt journalistesch Erfarung iwwer Stagen oder Vakanzenjobbe gemaach.
Interesséiert?
Wann déi Punkten dech uschwätzen, da schéck eis deng Kandidatur mat Motivatiounsbréif, CV a Casier judiciaire wgl. bis spéitstens den 21. Abrëll 2025 per Email un rh@100komma7.lu.