Ier et vun der Paräisser Plaz, net wäit vun der Stater Gare lassgaangen ass, hunn d’Organisateuren d’Manifestanten dozou opgeruff, friddlech ze protestéieren a sech beim Marsch iwwert de Pont Adolphe Richtung Chamber un de Code de la route ze halen. Equipéiert mat Schëlder, Loftballonen an enger Museksanlag ass et da lassgaangen.
D’Fuerderung vun de Manifestanten ass kloer: Dealere solle verhaft kënne ginn an déi Drogenofhängeg solle méi Hëllef kréien. Dofir bräicht een eng interministeriell Zesummenarbecht, seet d’Laurence Gillen, wat d’Manifestatioun mat organiséiert huet.
“D’Police kann net alles eleng maachen. Dat heescht mir brauchen een Aktiounsplang mat der Santé, mam Logement, mat der VDL. Dat géif jo och de Leit hëllefen, déi et brauchen, dat heescht déi Drogenofhängeg Leit.”
Ënnert den Demonstrante waren haaptsächlech Awunner vun der Gare. Och den ADR-Deputéierten Tom Weidig an de fréieren LSAP-Minister Franz Fayot si mat marschéiert.
Zanter der leschte Manifestatioun am September zejoert hätt sech praktesch näischt geännert. Dofir sinn Demonstranten frustréiert.
Um kuerz virun 12 Auer sinn déi iwwer 100 Manifestanten dann um Krautmaart ukomm. Eng sécher Gare géif och ee séchert Lëtzebuerg bedeiten, huet et nach an der Ried virun der Chamber geheescht, ier sech d’Manifestatioun da lues a lues erëm opgeléist huet.
D'Sophie Schroeder war fir eis op der Plaz
