An der éischter Radiostonn lauschtere mir Geschichte vum Pechschwéngchen a begéinen engem ganz besonneschen Erfinder.
An der zweeter Radiostonn kucke mir eis d'Faarwen an der Nuecht un a lauschteren d'Weltpremière vum Auteur Jhemp Hoscheit senger Geschicht "Den Eppes".
An der drëtter Radiostonn schwätzen d'Kannerreporter mam Nikki Ninja a mat engem Unisprofessor, deen eis alles iwwer KI, Kënschtlech Intelligenz, verréit.
An der véierter Radiostonn baue mir eng Energiespuerluucht, gi méi iwwer Meteoritten a Feierbäll gewuer a begéinen eisem ale Frënd, dem Jos.
An der fënnefter a leschter Radiostonn gi mir an de natur muséee, mir kréie Besuch vum verréckte Professer a spillen de leschten Deel vum Jos.
Wëll dir d'Lauschtergeschichten vun der Kannerradionuecht all eenzel lauschteren? Da gitt emol an eis Kannerkëscht luussen:
Och wann s du keng Geleeënheet has fir dech unzemellen, d'Matmaach-Heft kanns du hei als PDF Dokument eroflueden.
Matmaach-Heft Kannerradionuecht 2023
Léif Fans vun der Wëssenschaft a léif hell Käpp,
Sidd dir prett fir déi éischt Kannerradionuecht? Mir freeën eis op en Owend voller Geschichten, Experimenter a Musek.
Haut den Owend stinn d’Tessy Steffen Koenig an de Jean-Claude Majerus fir iech bis Mëtternuecht am Radiolabo an hunn och e puer verréckt Professeren a Professorinnen an Erfinder:innen invitéiert. Mat hinnen zesumme loosse mir Hoer zu Bierg stoen a Faarwen an der Däischtert danzen.
Spannend um Radio ass, wéi Biller just duerch Schwätzen an Nolauschteren an d’Käpp gezaubert ginn. Dofir hu mir Radio gären a wëllen iech dës Faszinatioun a genial Erfindung weiderginn a méi no bréngen.
Mee näischt ass méi schlëmm, wéi e virwëtzege Kapp, deem säi Bauch grommelt, oder? Dowéinst hu mir e puer Rezepter fir iech erausgesicht, déi dir zesumme mat äre Frënn, Famill oder Schoulkolleegen a -kolleeginnen nomaache kënnt.
Zäit fir ze raschten an ze spillen ass natierlech och. Dir musst net déi ganzen Zäit just virum Radio verbréngen. Sicht iech är Favoritten eraus a gestalt äert eegent Radioerliefnis.
Speziell fir d’Kannerradionuecht huet d’Nikki Ninja eis e Lidd geschriwwen, an dat spille mir ganz exklusiv um Radio. Spëtzt är Oueren a loosst ärer Fantasie fräie Laf, wa mir zesummen op eng spannend Rees duerch déi faszinant Welt vun den Experimenter a Geschichte ginn.
Eng Weltpremière ass och d’Lauschtergeschicht vum “Den Eppes”, deen op der Kannerradionuecht déi éischte Kéier ze héieren ass.
Mir freeën eis op iech!