D'Entwécklungen a Saache Rassismus an Haassried zu Lëtzebuerg géifen dem Sergio Ferreira Suerge maachen. Och um politeschen Niveau hätt een an de leschte Joren ëmmer méi "schlëmm Saache gesinn". Dorënner dem ADR-Deputéierten Tom Weidig säi Like op engem Facebook Post, deen opgeruff huet, "LGTBQ" ze "vernichten". (Am Message, deen den ADR-Deputéierten Tom Weidig op Facebook geliked hat, stoung präzis: "Mir mussen och hei kempfen an LGTBQ vernischten". An enger éischter Versioun vun dësem Artikel hate mer fälschlecherweis "LGBTQIA+ Communautéit" zitéiert). Déi aner Parteien an der Chamber haten de Like vum Tom Weidig gemeinsam ausdrécklech verurteelt.
Dem Sergio Ferreira no, misst d'Chamber awer méi wäit kënne goen. Ënner anerem sollt d'Chamber Deputéiert bestrofe kënnen, wann déi sech net un d'Wäerter vun der Constitutioun an der Mënscherechtserklärung halen.
"Et musse Konsequenze ginn. Mir hate gesinn, relativ rezent Geschichten am Europäesche Parlament. Do ginn och europäesch Deputéiert bestrooft. Firwat net hei am Land?"
Et bräicht och déi néideg Moyenen
Schonn un déi viregt Regierung war et d’Fuerderung, een Nationalplang géint Rassismus opzestellen. An deem missten ënner anerem präventiv Mesurë festgehale ginn, oder nach d’Méiglechkeet fir d’Donnéeën iwwer Rassismus an Zuelen ze erfaassen. Bis elo gi Virfäll, déi rassistesch motivéiert sinn, net systematesch erhuewen. Ee Punkt deen 2023 och vun der Europäescher Kommissioun géint Rassismus (ECRI) kritiséiert gëtt.
Et géif awer net duergoen, Mesuren an dem Nationale Plang géint Rassismus festzehalen. Et bräicht och déi néideg Moyenen, ënnersträicht de Sergio Ferreira.
Plattform Voĉo: Beonrouegend Signaler vun der Regierung
Antëscht gëtt et eng nei Plattform zu Lëtzebuerg mam Numm Voĉo. 25 Associatiounen aus der Zivilgesellschaft sinn dorënner rassembléier, och d’ASTI. Zweck vun der Plattform ass et, sech gemeinsam vis à vis vun der Regierung ze positionéieren.
Uganks dës Joers hätt een nach eng positiv Entrevue mam Premier Luc Frieden gehat. Entretemps hätten d’Associatiounen awer beonrouegend Signaler vun der Regierung kritt. Virop déi zwee Gesetzesprojete zum d’Versammlungsrecht an dem Plazverweis beonrouegen d'Associatioune vun der Plattform Voĉo.
