"Mir bleiwen drun" - Mat dëse Wierder huet de President Emmanuel Macron sech op der Plattform X zu Wuert gemellt an annoncéiert, datt een der EU haut eng nei Versioun vum Gesetzestext presentéiert hätt. Dat nodeems de franséische President säi Premier beoptraagt hat e Kompromëss ze fannen, dee souwuel mat der franséischer Verfassung wéi och mam europäesche Recht am Aklang ass.
Dëst wier elo no engem riguréisen techneschen Aarbechtsprozess de Fall, esou de Macron. D’Haaptkritik vum Conseil Constitutionnel war, datt d’Verbuet ze vage an den Definitiounen an deemno ze ëmfangräich war an och Säiten a Messenger-Déngschter wéi Youtube oder Whatsapp betraff hätt.
Sollen Ausname ginn
Wéi franséisch Medie mellen, hätt d’Regierung elo e méi klore Fokus op verschidde schiedlech an addiktiv Funktioune wéi Autoplay oder masseweis Notifikatioune geluecht an esou d’Social Media-Plattforme méi genee cibléiert. Et sollen och Ausname fir Jonker tëschent 13 a 15 Joer ginn, wann d’Elteren zoustëmmen.
Frankräich fuerdert en EU-Gesetz
Den Emmanuel Macron huet och betount, datt Europa elo séier misst handelen an en EU-wäit Verbuet op de Wee soll bréngen. E puer Stonne méi spéit huet d’EU-Kommissioun annoncéiert, datt d’Presidentin Ursula von der Leyen nach dës Woch e Gesetzesprojet heizou wäert presentéieren.
Fir den Emmanuel Macron ass d’Verbuet e Kärprojet vu senger zweeter Amtszäit, déi éischter vu Mësserfolleger a Chaos gepräägt ass. Dofir wëll hien, datt d’Verbuet a Kraaft trëtt, éier hien am Mee säin Amt wäert verloossen.
