De CEO vum Satellittebedreiwer SES huet confirméiert, datt d‘SES en Deel vun der Satellitte-Produktioun op Lëtzebuerg wëllt bréngen. Et wier ze deier a géif ze laang daueren, fir d‘Produktioun weider komplett ze outsourcen, sot de CEO vun SES, den Adel Al-Saleh, a senger Ried. Den Ament géif et fënnef bis siwe Joer dauere fir e Satellit ze entwéckelen.
Neie Space-Campus op der Kockelscheier
Esou kéint een net iwwerliewen, esou den Adel Al-Saleh. D'Käschte missten ëm iwwer 50 Prozent reduzéiert ginn.
D‘SES géif d‘Kontroll iwwer hir Liwwerketten iwwerhuelen a géif zu Lëtzebuerg Produktiounscapacitéiten opbauen. Et wier amgaangen déi dofir néideg Talenter unzezéien.
Am Fréijoer wéilt d’SES en Entwécklungs-Labo um neie Space Campus op der Kockelscheier opmaachen.
Manner Regulatioun, méi Kompetitivitéit
De FEDIL President Georges Rassel huet a senger Ried méi Deregulatioun gefuerdert, fir d’Betriber méi kompetitiv ze maachen.
De Premier Luc Frieden huet proposéiert, datt Regierung sech eng vun den Entreprisen zesummegestallte Lëscht vu Regulatiounen ukuckt, fir verschiddener dovun eventuell unzepassen.
2026 - d'Joer vun der Kompetitivitéit
All regulatoresch Legislatioun wier ëmmer gutt gemengt, mee wann all d‘Regulatiounen zesummekommen oder ze vill ënnerschiddlech sinn, kéint d'Regulatioun zu enger Laascht ginn. An déi kéint déi ekonomesch Entwécklung an d'Kompetitivitéit behënneren, esou de Premier.
D'Kompetitivitéit wier d'Prioritéit fir d'Joer 2026.
