Zu der Fro, wéi laang de Kulturministère iwwert dëse Fall Bescheed wousst, ier de Kënschtler ausgewise gouf, preziséiert de Kulturminister och: Ugangs Juli schonn hätt e Jury dem Kënschtler seng Demande, fir en Atelier zu Buerglënster ze lounen, positiv aviséiert. De Kulturministère hätt dorop hin de Kënschtler kontaktéiert an hien no engem valabelen Titre de séjour gefrot, fir d‘Locatioun vum Atelier kënnen ofzeschléissen. Well d‘Prozedur fir d‘Erneierung vun där Openthaltsgeneemegung deen Ament nach am gaange war, hätt de Kulturministère dunn och bei der Immigratiounsdirektioun nogefrot, wéi laang dat nach dauere géif. D‘Immigratioun hätt deen Ament awer keng Informatioune kënne ginn.
Den Atelier zu Buerglënster hätt schliisslech un en anere Kënschtler misse verlount ginn, well den Alborz Teymoorzadeh dem Kulturministère eng Openthaltsgeneemegung net zur Zäit konnt virleeën, esou nach de Kulturminister Eric Thill.