Ob de Verbrennungsmotor klimaschiedlech wier oder net, géif dovun ofhänke, wéi e getankt gëtt, argumentéiert de Petitionair Eric Derume. Mat alternative Kraftstoffer, wéi zum Beispill E-Fuels kéint och een Auto mat Verbrennungsmotor klimaneutral fueren. Déi Alternativ géif vu vir eran als onméiglech duergestallt ginn, bedaueren d’Petitionairen.
Ausserdeem wier d’Technologie vun den Elektroautoen nach net ausgeräift genuch. De Petitionair kritiséiert awer virun allem d’Aart a Weis, wéi dës Decisioun geholl gouf.
"Datt d’Schwächte vun den Elektroautoen, déi et ginn, vun der Politik ignoréiert ginn an de Bierger einfach viru faits accomplis gesat gëtt. Mir si fir d’Technologie-Fräiheet. D’Zukunft fir klimafrëndlech E-Fuels soll gefuerdert ginn an net ignoréiert ginn. Et ass net un der Politik an de fräie Marché anzegräifen an Technologien ze verbidden, mee si solle Rahmebedingunge schafen. Keen CO2 méi ab 2035. Ok, domat steet et der Industrie fräi, wéi si dat Zil erreechen. Firwat dierf de Marché net selwer entscheeden, wéi si de Green-Deal an déi emissiounsfräi Mobilitéit wëll gestalten?”
No der Debatt koum d’Petitiounskommissioun zu der Konklusioun, datt een d’Bierger méi iwwer dëse Sujet informéiere wéilt.
