Ënner anerem solle Reciproctaxen op Importer aus anere Länner ëmgesat ginn. Dat heescht, datt d‘USA deen nämmlechte Prozentsaz un d'Taxe froe géif, deen aner Länner op amerikanesch Produite gesat hunn. Domat sinn dann Handelspartner gemengt, vun deenen den Donald Trump seet, si hätte jorelaang op d'Käschte vun den USA profitéiert.
Dorënner d'Europäesch Unioun, China oder Brasilien an och Kanada a Mexiko. An enger éischter Phas sollen da Medezin, Koffer a Bauholz taxéiert ginn. Länner, déi Pëtrol aus Venezuela bezéien, sollen och gestrooft ginn. Dat andeems Taxen op Importer aus deene Länner ëmgesat ginn. Dat obwuel d'USA selwer och Pëtrol aus dem Venezuela importéiert.
Nom Prinzip "America First"
Ob déi Taxe wierklech kommen ass och nach net sou kloer. Et wier net déi éischte Kéier, datt den Donald Trump Taxen ukënnegt, se dann awer net an deem Mooss oder iwwerhaapt ëmsetzt.
Den Donald Trump sot och, e géif e puer Länner eng Paus ginn, éier d'Taxe wierklech géifen a Kraaft trieden.
D'Zil wier et, d'Firmen nees an d'USA ze lackelen an doduerch Aarbecht ze schafen. Dat virun allem a Regiounen, wou et de Leit finanziell net gutt geet. Dat nodeems d'Industrie virun e puer Joer do fortgaange sinn. Den Trump erhofft sech doduerch, datt erëm méi Wueren an den USA selwer produzéiert ginn, ganz nom Prinzip America First.
Ekonomiste bezweiwelen, datt dat d‘Wirtschaft ukuerbelt
Ekonomiste bezweiwelen awer, dass doduerch d'Ekonomie an den USA sech verbessere kéint. Éischter am Géigendeel. D‘Produite ginn nämlech och fir d‘Amerikaner:inne méi deier. D‘Ekonomiste si sech eens, datt am Plaz d‘Wirtschaft unzekuerbelen, éischter een héije Risiko vun enger Rezessioun besteet.
Et gëtt och iwwerhaapt keng Garantie dofir, datt sech Firmen duerch déi Taxen an den USA néierloosse wäerten. Well esou eng Relokaliséierung géif laang daueren, warscheinlech méi laang wéi dem Trump seng Amtszäit. Vill ze vill Opwand, an deemno wien nächste President gëtt, den Opwand net mol wäert. Dat op d‘mannst fir déi grouss Entreprisen.
"Dat ass mir ganz egal"
Duerch d'Taxe kéinte virun allem d'Präisser vun den Autoen, déi jo och cibléiert sinn, ferm an d'Luucht goen. Dem Trump seng trotzeg Äntwert do drop war awer: „Dat ass mir ganz egal. Well d‘Leit fänken dann un, amerikanesch Autoen ze kafen."
Den neie kanadesche Premier Mark Carney huet, wéinst den ugekënnegten Taxen, d'Partnerschaft tëschent Kanada an den USA als fäerdeg betitelt. Déi mexikanesch Presidentin wollt sech nach net dozou äusseren, an och aus Europa sot de franséische President Macron schonn, datt e keng gutt Auswierkungen doduerch géif gesinn, weder fir d'USA nach fir Mexiko, Kanada oder Europa. Hie gesäit éischter ee Loose-Loose-Deal. Mee net nëmmen Handelspartner hu sech dozou geäussert, och d'Christine Lagarde, d'Presidentin vun der EZB, gesäit d'Taxen als eng Chance fir Europa un, dat als "Ufank vun engem Wee an d'Onofhängegkeet."