Et géing vill Aarbecht bevir stoen, esou d'Yuriko Backes no der Entrevue. Si betount, datt et déi éischte Kéier ass, datt esou eng grouss Colloque zu Lëtzebuerg organiséiert ginn ass.
Verweis op de Koalitiounsaccord
Datt den nationalen LGBTQIA-Plang iwwerschafft soll ginn, stéing am Koalitiounsaccord. Dorunner wéilt d'Ministesch dann och festhalen.
"Et ass wichteg, nozelauschteren. Et ass wichteg, vun den LGBTIQ-Communautéiten ze héieren. Wat sinn hir Besoinen? Méi wéi 100, méi wéi 120 Leit, sinn haut hei zesummekomm. Et ass drëms gaangen, iwwer verschidden Thematiken ze schwätzen, fir nozelauschteren, fir dat gutt opzeschreiwen, fir da kënne ganz konkreet de Suivi ze maachen.”
Konkret Mesurë wollt d’Ministesch gëschter awer nach net nennen. Si verweist op eng Rei Mesuren, déi schonn am Koalitiounsaccord festgehale goufen, wéi zum Beispill d’Méiglechkeet op een neutraalt Geschlecht an den Ausweisdokumenter oder e Verbuet vun de Conversiounstherapien.
Yuriko Backes: “Lëtzebuerg lieft net an enger Bule"
An engem Aarbechtsgrupp vu gëschter gouf méi detailléiert iwwer de Pushback geschwat, deen een aktuell ka gesinn. Mat Pushback ass d’Zeréckdränge vun den erkämpfte Rechter gemengt. Dat géif ee souwuel bei de Fraerechter, wéi och bei der LGBTQIA+-Communautéit gesinn, esou d’Yuriko Backes.
“Lëtzebuerg lieft net an enger Bule. Dat heescht, dat fierft sech och alles op Lëtzebuerg of. Mir hu gesinn, d'Petitioun, de ganzen Debat ronderëm d'Petitioune virun e puer Méint an der Chamber, wat dat och fir Haasskommentaren op de Sozial Medien ausgeléist huet. Dat heescht, dat muss ee scho wierklech ganz, ganz seriö huelen."
Si perséinlech wier absolutt engagéiert fir géint dee Pushback ze kämpfen, esou d'Yuriko Backes.
Amerikanesch "Flüchtlingen" aus der LGBTQIA+-Communautéit
Den Tom Hecker, President vun der ASBL Rosa Lëtzebuerg, hat sech gëschter um Méindeg am 100,7-Interview besuergt iwwer déi aktuell US-amerikanesch Situatioun gewisen. Et géif ee sech scho mental drop virbereeden, datt ee mat Flüchtlingen aus der LGBTQIA+-Communautéit aus den USA misst rechnen. Eng Ausso, déi och der Gläichstellungsministesch net nei ass.
“Ech hunn dat och scho gehéiert. Ech war virun zwou Wochen zu New York op der Conference on the Status of Women, wat eng UNO-Konferenz ass. An deem Kader hunn ech och mat ville Leit kënne schwätzen an do krut ech och matgedeelt, datt also d'Demandë fir Lëtzebuerger Pass ze kréie vun LGBTQIA+ an och Fraenorganisatiounen an d'Luucht gaangen ass."
Dofir wier si vun den Aussoe vum Tom Hecker och "net verwonnert" gewiescht, esou nach d'Yuriko Backes.
