De Romain Bausch huet och dovu geschwat, datt zum Beispill a Saachen Inflatioun den Impakt vum Plafonnement vun den Energiepräisser impressionnant wier.
“Wann 2025 d’Produkter net méi subventionéiert ginn, geet de Gaspräis fir de Konsument ëm 17 Prozent erop, an de Präis vum Elektresche geet ëm 60% erop. Dat si selbstverständlech dramatesch Augmentatiounen.”
Laangfristeg Siicht schafen an op Defizit bei der sécurité sociale am Ae behalen
Dat makroekonomescht Ëmfeld wier net katastrophal, mee géif awer schwiereg bleiwen, sou de CNFP-President. Bei der sécurité sociale wier 2023 mat ronn 1,05 Milliarden Euro den héchste Surplus gemaach ginn, elo géif dee Surplus awer konstant erofgoen „an um Enn vun der Period, déi hei ofgedeckt ass, ass en nach 261 Milliounen.”
De CNFP wënscht sech donieft, datt en neien nationale Budgetskader mat mëttel- a laangfristeger Siicht geschafe gëtt. De Conseil national des Finances publiques wier prett, fir do matzeschaffen, sou de Romain Bausch.