International Hëllefsorganisatioune kritiséieren, datt den Accord net konkret genuch wier. Fir de Cédric Reichel vun der ASTM ass ganz kloer, datt dat en Accord ass dee vu Muecht-Parteie gemeet gi wier an datt mat deem Accord d’Klimazil vun maximal 1,5 Grad net erreecht wäert ginn.
"(...) d' Weeër dohinner ginn net beschriwwen an déi sinn absolut net konkret. Et ass en Accord voller Lächer a voller Ondäitlechkeeten.”
E weidere grousse Kritikpunkt ass de Finanzement vun engem Fonds, deen déi am meeschte vulnerabel Natioune soll ënnerstëtzen, well déi am meeschte vun de Konsequenze vum Klimawandel betraff sinn. Déi schlussendlech Zomm géif bei Wäitem net duer goen, sou de Cédric Reichel.
Ënnerschiddlech Opfaassungen iwwer néidege Betrag
Zum Bäitag dee Lëtzebuerg dozou wëllt leeschten, hat den Ëmweltminister Serge Wilmes, rezent hei op der Antenn gesot, am Verglach zu Holland, géif et méi wéi een Euro op de Kapp ginn.
D’ASTM huet do ganz aner Zuelen, déi si fir néideg emfannen.
“Mir hu lescht Joer eng Étude erausginn, wou mir einfach mol e Calcul gemaach hunn, wat wär dann di ugemiesse Responsabilitéit vu Lëtzebuerg an dat, do ware mer bei 324 Milliounen ab 2030 erauskomm. Also do si mer wäit ewech vun sou engem Euro."
D’ASTM wënscht sech dofir, datt den Dialog och mat där neier Regierung bestoe bleift, datt déi lëtzebuergesch international Klima-Finanz-Politik nohalteg an gerecht ass.