Op Gebuertsdeeg bliedert ee gäre mol a Fotosalben a schwätzt iwwer al Geschichten. De radio 100,7 feiert um 19. September seng 30 Joer an och mir geheien e Bléck zeréck mat den dräi Invitéeë Sophie Morang, Dany Weyler a Carlo Link. Si all hunn e staarke Lien zum Radio a sinn zanter senger Grënnung fir de Radio aktiv.
"Ganz am Ufank huet een nach mat grousse Bänner geschafft. Déi sinn da geschnidde ginn. A wann ee sech da verschwat hat, huet een et eben nach eng Kéier geschwat mee herno huet een dat da jo missen eraus schneiden. An dann hat een heiansdo Stécker ronderëm den Hals hänken an dann huet ee se rëm richteg missen zesumme pechen."
"Effektiv déi hallwe-Stonnen-Emissiounen dat war scho grouss. Dat war e Band vu 25 Zentimeter Duerchmiesser. A wann s de do net oppass, dat huet sech wéi e Fuessbännchen lassgewéckelt an dann, bonne chance. Dat konnts de knécken dat krus de ni méi sou zesummen."
“Sou sinn ech eigentlech bei dee Radio komm. Ech hu mech ganz normal beworben an du gouf et jo schonn en Direktiounswiessel dofir krut ech do keng Äntwert. A bemol koum e Bréif an d’Haus geflattert. An dat hunn ech och immens verhale well dee Bréif war op Lëtzebuergesch, dat hunn ech mer déi 30 Joer verhalen.”