15.6. Generatiounen
Inkontinenz am Alter
Blasenschwäche? Nein Danke! Incontinence? Non merci!, dat ass den Titel vun engem Dossier, deen een um Site vum RBS noliese kann oder an der Broschür "aktiv Dossier". Inkontinenz ass en Tabutheema, deen awer am RBS Center fir Altersfroen ëmmer nees thematiséiert gëtt, sief et an Artikelen oder mat Info-Konferenzen.
Belaaschtungsinkontinenz an Dranginkontinenz sinn déi heefegst Forme vun Inkontinenz bei eelere Leit. Den Alain Brever Direkter vum RBS Center fir Alterfroen schwätzt mam Angie Maquil iwwer méiglech Ursaachen a méiglech Therapien. Detailer och op http://www.rbs.lu
Hien ass kee Millionär
Et geet ëm d'Traditioun vun der Matbestëmmung vun den Eltere beim Choix vum zukünftege Partner, déi am Vinylzäitalter nach akut war. D'Meedche fënnt de Victor immens, d'Eltere fannen de Victor net immens. Si hätte gären e "bessersituéierte" Mann fir hiert Meedchen an halen och dorobber.
D'Lidd gouf bei der Plackefirma Delta editéiert. Den Orchester vum Pianist Jean Roderes begleet d'Mesy Faber, déi am Januar 2020 an hirem 95. Liewensjoer verstuerwen ass.
Kee Goût oder keng Méiglechkeet gutt ze knaen
Wa jonk Leit kee Fleesch méi iesse wëllen, huet dat meeschtens aner Ursaachen, wéi wann eeler Leit ufänken de Steak um Teller léien ze loossen.
Déierequälerei, Klima-, Ëmweltschutz a gesondheetlech Argumenter loossen ëmmer méi jonk Leit e Bou ronderëm d'Fleesch maachen a si gi Vegetarier, oder wa si ganz op déieresch Produite verzichten, vegan.
Och an den Altersheemer ginn et ëmmer méi Leit, déi kee Fleesch méi iesse wëllen, woubäi d'Ursaachen hei meeschtens ganz anerer sinn, wéi d'Dieteticienne Michèle Meyer an de Seniorenheemer observéiert huet.
Méi Informatiounen op https://dieteticienne-meyer.lu/
Visittekaart: Marie Josée Kerschen
Am November 1993 war d'Marie-Josée Kerschen, Sculptrice vu Beruff, beim Jean Portante virum Mikro. Zesummen wollte si den Nolauschterer de Beruff vum Sculpteur hei zu Lëtzebuerg méi no bréngen. De Jean Portante wollt vun der Marie-Josée Kerschen ënner anerem wëssen, ob d'Lëtzebuerger Skulpturen a Molereien sech weise loossen a Leit unzéien?
Hair - Good Morning Sunshine
Enn de 60er Jore sollt de Musical "Hair" wuel e Groussdeel vun der Gesellschaft schockéieren. Et geet ëm Drogen, Sex an Alkohol, mee och ëm probéieren am Fridden ze liewen. Dëst an enger Zäit, an där d'USA am Vietnamkrich involvéiert waren. Verschidde Melodië sinn haut Klassiker.
Detailer mam Manuel Ribeiro.
