Jessy Lanza - All The Time Ustiechend R'n'B-Diskokugel-Atmosphär mat Kapp

Fir den Album vun der Woch geet et déi Kéier op d'Danzfläch. Dëse Freideg bréngt nämlech d'Kanadierin Jessy Lanza hir drëtt Plack "All The Time" eraus, an den Jamie Reinert ass vun hirem intelligente Pop begeeschtert.

Jamie Reinert

Jessy Lanza - All The Time

Zanter 2013 fabrizéiert d'Jessy Lanza e séissen experimentellen Amalgamm vun eklekteschem Synthpop, 90er R'n'B, Funk a villes méi, an dat mat der richteger Dosis Kitsch. Déi fréier Museksproff aus dem Ontario geet mat enger besonnescher Sensibilitéit un hir Aarbecht erun a liwwert op hirem neie Wierk Discokugel-Atmosphär mat Kapp. Hir eckeg Beats schläiche sech frech un een erun. D'Rhythme si komplex awer direkt. Intelligente Pop kéint ee soen, wou d'Kierperlechkeet ni op d'Käschte vum Verstand sacrifiéiert gëtt. Wou een engersäits ofschalte kann, awer trotzdeem genuch Substanz gebuede kritt fir déi gro Matière waakreg ze halen.

Der Jessy Lanza hir räich a muusseg Produktioun ëmwéckelt ee wéi Watt. Si appreciéiert och d'Konscht vun engem gudden Hook. Op "All The Time" kritt ee genuch musikalesch Motiver, kleng Melodië gebueden, déi ee wéi en Hoken afänken. Et ass och virun allem der Kanadierin hir eegenaarteg Stëmm, déi een anhëlt. Janet Jackson a Patrice Rushen si present, awer ebe staark mat Effekter traitéiert. D'Jessy Lanza an hire musikalesche Partner, den Jeremy Greenspan, dee si zanter hirem Debut a Saache Produktioun begleet, hu sech zemools mam Delay, dee mat vill Takt a Kreativitéit agesat gëtt.
Den neien Album ass gefëllt mat charmant louche Sounds. Et blubbert, zischt, jiipst an heiansdo schéngt et wéi wann de Synthi esouguer räpse géing. Eegenaarteg Téin, déi op der Danzfläch schmunzelen dinn, an an der Geschicht vun der elektronescher Musek verankert sinn. D'Jessy Lanza weist eng Maîtrise vum Synthesizer an Drum machines op, eng Passioun fir déi futuristesch Apparater mat ville Knäppercher a sëllegen Optiounen. Um Enn huet sech eng reduzéiert Palett vu Kläng erauskristalliséiert, déi "All The Time" zu enger eenheetlecher, awer trotzdeem variabeler Experienz maachen.

Der Jessy Lanza hir Musek beweegt sech tëschent Underground a Pop. Si genéisst grad esouvill déi mierf elektronesch Welt vum Yellow Magic Orchestra, wéi déi neiste kommerziell Single vum Drake. Hir Pop-Visioun ass inklusiv a gëtt engem eng frësch an hoffnungsvoll Perspektiv op d'Lag vun der populärer moderner Musek. D'Texter huelen eegenen Aussoen no déi Kéier eng méi wichteg Roll un. D'Kanadierin verschafft hir Roserei géigeniwwer der Gesellschaft. Dialogéiert mat sech selwer, hannerfreet, wat vu Fraen erwaart gëtt. Hanner dem musikalesche Glitzer stécht méi wéi ee mengt.

"All The Time" ass eng zerebral awer immens danzbar Pop-Plack mat ville wonnerbar laangen Delay-Spuren, déi ee bis an d'Onendlechkeet begleeden.

An der Mediathéik:

Album vun der Woch / / Jamie Reinert
Lauschteren

Méi zum Thema

Arca
Arca - KiCk i

D'Kënschtlerin Arca ass als Produzentin hanner Stars ewéi Björk, Kanye West. Mat "KicK i" presentéiert si lo hire chaotesche Popentworf, dee vun haardem Reggaeton bis schmalzege Balladenmusikalesch alles ofdeckt.

Jockstrap
Jockstrap

Mat hire réien an dramatesche Kläng, eckegen an iwwerraschende Wiessel, fabrizéiert den engleschen Duo Jockstrap eng kéng Klangwelt. Hir experimentell Musek ass couragéis a frontal. E Gespréich.

Net verpassen

  • Offre d'emploi: Journaliste-présentateur/trice

    radio 100,7

    L'Établissement de Radiodiffusion Socioculturelle, opérateur de la radio de service public radio 100,7, recherche Un/e Journaliste-présentateur/trice sous contrat à durée indéterminée et à tâche complète (40h/semaine).

Programm

  • Notturno

  • On air

    Virum Dag vu 6 bis 10

  • Sot emol vun 10 bis 11

  • Iwwer Mëtteg vun 11 bis 2

  • Resonanzen

Dossieren

  • Olympesch Spiller 2021

    D'Olympesch Spiller fannen, mat enger Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

  • Déi national Anti-Krise-Pläng an der EU

    Wat maachen d'Länner mat den Suen, déi hinnen aus dem Europäeschen Fonds de Relance zoustinn? An eiser Rubrik Europa Aktuell huele mer déi national Pläng ënner d'Lupe.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen