Album vun der Woch D'Delikatess vum "Vintage-Sound"

"The Unborn Capitalist From Limbo" ass dat éischt eegent Wierk vum Cory Hanson. A sengem Solo-Album weist de Frontmann vun der kalifornescher Garage-Psych-Rockband "Wand" sech mat méi intimen a rouege Téin.

Philippe Hansen / nw / po

Cory Hanson
(Foto: © Kyle Thomas)

Zanter 2014 huet den Trio "Wand" dräi "Longplayer" eraus ginn. Elo ass de Frontman Cory Hanson nees zeréck, dat awer mat sengem éischte Soloprojet.

Hie gëtt dacks mam Ty Segall associéiert, well deen zesumme mam Hanson eng Rei aner musikalesch Projeten an de leschte Joren op d’Been gestallt huet, ënner anerem och dem Ty Segall säin aachte Longplayer "Emotional Mugger". Zwee Bandmembere vu "Wand" waren och beim Ty Segall senger Backing-Band "The Muggers" mat derbäi: De Perkussionist Evan Burrows an de Cory Hanson.

Mä wat de charismatesch, awer relativ zeréckhalenden Hanson op sengem Debut-Longplayer ze bidden huet, schéngt vill méi intimistesch, méi zeréckgehalen a méi roueg ze sinn, ewéi bis ewell gewinnt.

Mat aacht Titelen d'Welt beschreiwen

Dem Hanson seng Ambitioun läit an der Delikatess vum "Vintage-Sound", ouni awer iergendwou deen ale familiäre Style ganz ewech ze loossen. An der Haaptsaach läit et um Cory Hanson senger Stëmm. Um Album "The Unborn Capitalist from Limbo" iwwerzeegt hien an enger Tounaart, déi ee soss net vun him gewinnt ass. Trotzdem bleift hien op seng gewinnte Manéier psychedelesch.

Dobäi kënnt eng gutt Portioun akustesch Gittaren a Sträicher, déi ee bei verschiddenen Titelen direkt an eng vergaangen Ära verschloen. Fir den Album gëtt den Hanson sech nëmmen aacht Titele fir d’Welt ze vermëttelen an där mir liewen.

Melancholesch, net traureg

"The Unborn Capitalist from Limbo" ass schéin an awer och bizar. Sämtlech Titele si melancholesch an awer net onbedéngt traureg. D’Qualitéit vum Produit läit am professionelle "Songwriting", dee perfekt nieft enger Lava-Luucht mat Räucherstäbecher ze genéissen ass. Emotioune kommen egal wéi op.

Et ass alles an allem en orchestréierte psychedelesche Softfolk-Album, deen ouni Influenze wéi "Nick Drake", "Sixto Rodriguez", "The Plastic Ono Band" a "Bill Fay" net géing existéieren. Eng aner Säit vum Frontmann vu "Wand", eng sympathesch Säit, déi dem Cory Hanson seng musikalesch Maturitéit am Positiven ervirhieft.

An der Mediathéik:

Lauschteren

Méi zum Thema

Foxygen.jpg
Album vun der Woch

Mat hirem véierten Album hu Foxygen ee verréckt, orchestralescht Wierk geschafe, dat sech wéi ee Rockmusical aus de 1970er Joren unhéiert. Dobäi ass och ee ganze Sympohnie-Orchester ze héieren.

Antifragile
Post Rock

Zënter iwwer zwee Joer maache si sech een Numm op de Lëtzebuerger Bühnen. Elo kënnt endlech den Debut-EP vun Antifragile eraus. Dee markéiert schonn nees den Ufank vun enger neier Schafensperiod.

Jess Williamson
Americana

"Heart Song" ass der Jess Williamson hiren zweete Long-Player. Dës intimistesch Plack verklanglecht déi texanesch Wüstelandschaft. Als Nolauschterer riskéiert een d'Orientéierung ze verléieren.

Synthesis
Trip Hop vu Lëtzebuerg

No dräi Joer Paus melle Synthesis sech zeréck. Den Duo schafft un engem neien Album an un enger opwänneger Live-Show. D'Approche ass eng ganz aner wéi um éischten Disk. D'Ambitioune si grouss.

Net verpassen

Dossieren

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

  • Saint-Malo: "Étonnnants Voyageurs"

    Saint-Malo ass déi Plaz, wou déi sougenannt ''littérature-monde'' gefeiert gëtt. Den 100,7 war bei der leschter Editioun vum Festival Étonnants Voyageurs am Juni dobäi.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen