Sample vun der Woch Parliament - Flashlight
Et kann ee keng Sendung iwwer Sample maachen, ouni iwwer Parliament ze schwätzen. 1978 hu si d'Lidd "Flashlight" erausbruecht. Dat gouf geschriwwe vum George Clinton, Bernie Worell a Bootsy Collins zesummen, woubäi den George Clinton Sänger a Bandleader ass.
Hien ass 1941 am North Carolina an den USA gebuer an ass ëmmer nach aktiv. Hien ass offiziell Sänger, Songwriter, Produzent a Bandleader an och Grënner vun der P-Funk Mothership. Dat ass esou eppes wéi eng grouss Famill mat de Gruppe Parliament a Funkadelic zesummen.
Si si bekannt fir hir Mëschung aus Funk, Science Fiction, Moud, psychedelesch Aflëss a surrealisteschen Humor. "Flashlight" war deen éischte Groussen Hit vum P-Funk Kollektiv, woubäi Parliament ëmmer méi kommerziell orientéiert war a Funkadelic méi rockeg.
D'Inspiratioun fir dëst Lidd war anscheinend eng onendlech laang Jam, déi den George Clinton mat senge Museker organiséiert huet. Wann d'Grupp dëst Lidd live performed huet, waren dacks méi wei zéng Museker op der Bün, all verkleet, a si hunn dat Lidd méi wéi 40 Minutten an d'Längt gezunn, mat onendlech laange Soloen, woubäi dat Wichtegst ëmmer déi Bassline vum Moog bliwwen ass.
Inspiratioun fir aner Kënschtler
Dëst Lidd gouf Dosende vu Kéieren am Hip-Hop gesampelt, dat éischt Beispill ass de Snoop Dogg. Hie sampelt just e klenge Vocal Deel fir en Jingle fir seng imaginär Radiostatioun op sengem éischten Album "Doggystyle" ze maachen.
En anert Beispill wier de Redman. Hie benotzt d'Bass an d'Perkussioun vum Lidd "Flashlight" fir säi Lidd "So Ruff" doraus ze maachen. Dat war op sengem éischten Album "Whut? Thee Album".
Eng aner Grupp, déi de Sample benotzt huet, ass Digital Underground. Hiert Lidd heescht "Danger Zone" an zwar op hirem éischten Album "Sex Packets".
Mee ee vun menge Liblingslidder bleift natierlech dat vum Ice Cube. "Man's Best Friend" war op sengem zweeten Album "Death Certificate", deen 1991 op Lench Mob Records erauskoum. Hie beschreift hei, datt dem Mënsch säi beschten Kolleeg net den Hond, mee den Revolver ass.
An der Mediathéik:
LauschterenMéi zum Thema
Wien huet de funky Wuerm geklaut?
Kaum e Lidd gouf esou dacks gesampled wéi "Funky Worm" vun den Ohio Players. Den Titel vun 1973 war der Funk Band hiren éischte grousse Succès. Bis haut daucht en ëmmer nees an Hip-Hop-Produktiounen op.
