Klassesch Musek OPL op Tournée a Spuenien

Iwwer 120 Museker, Bühnentechniker, Produzenten a Responsabeler aus der Orchesterverwaltung sinn op Allerhellgen op Madrid geflunn: De Philharmoneschen Orchester Lëtzebuerg ass op Spuenien-Tournée. Den Ufank mécht ee Concert am Auditorio Nacional zu Madrid. Duerno geet et weider op Valencia, Saragossa an Alicante.

Guy Engels / cwi

OPL a Spuenien
De Gustavo Gimeno bei der Prouf am Auditorio Nacional zu Madrid

D'Stëmmung beim Orchestre Philharmonique du Luxembourg, kuerz OPL, ass exzellent während der Prouf am grousse Concertssall zu Madrid. De Gustavo Gimeno, de Chefdirigent vum OPL, weist mat präzise Gesten a kloren Usoen, wat hie gäre wëll. D'Museker sinn entspaant, awer duerfir net manner konzentréiert. "Ech sinn zefridde mam Verlaf vun der Prouf", verréit eis de Gustavo Gimeno.

Hien huet zwee ënnerschiddlech Programme fir dës Tournée preparéiert: Engersäits "Le Sacre du Printemps" vum Strawinsky, kombinéiert mam Geieconcerto vum Tschaikowsky. Anerersäits déi 7. Symphonie vum Bruckner, zesumme mam Geieconcerto vum Schumann. Et ass dem Chefdirigent vum OPL no net einfach, esou no openeen zwee komplett verschidde Programmen ze spillen. "Do muss ee séier ëmdenken an ëmmer fokusséiert bleiwen.

Retour a Spuenien

Fir dee gebiertege Spuenier Gustavo Gimeno ass d'Tournée mam OPL eppes Besonnesches. Dëst Joer dirigéiert hien nëmme véier Concerten doheem - an dat sinn déi, mam Philharmoneschen Orchester Lëtzebuerg. Ganz speziell gëtt et fir hien, wann den Orchester zu Valencia, a senger Heemechtsstad, Statioun mécht.

De Maestro wierkt och am Gespréich no der Prouf nach enorm konzentréiert. Dat bleift fir hien esou, bis de Concert eriwwer ass. "'Éischter léist bei mir d'Spannung net no." Duerfir kéint hie sech och eréischt no all Concert richteg drop freeën, datt hien zeréck a Spuenien ass a Bekannter a Famill erëmgesäit.

De Sacre als roude Fuedem

Dem Igor Strawinsky säi Skandal-Ballet, de "Sacre du printemps", ass am Ablack de roude Fuedem an der Programmatioun vum OPL. Am Ganze wäert den Orchester d'Wierk aacht Mol bis un d'Enn vun der Tournée gespillt hunn. An der Prouf spiert een, datt den Dirigent an d'Museker bis un de Kär vun der Partitur komm sinn.

An awer fënnt de Gustavo Gimeno nach ëmmer kleng Detailer - hei eng Phraséierung, do eng Betounung - déi ee kéint besser maachen. "Fir mech ass souwisou all Concert anescht. Och wa mir ee Stéck ewéi de Sacre elo wierklech gutt kennen." A grad duerfir klappt Zesummenaarbecht mat der Geiistin Patricia Kopatchinskaja och esou gutt: Hei sinn zwee Museker op enger Wellelängt.


De Freideg 3. November proposéiere mer am Magasinn "Resonanzen" um 14 Auer ee Stëmmungsbild vun der OPL-Tournée a Spuenien.

Méi zum Thema

Patricia Kopatchinskaja
Klassesch Musek

De Philharmoneschen Orchester Lëtzebuerg ass op Tournée a Spuenien. Als Solistin ass d'Patricia Kopatchinskaja invitéiert, eng vun deenen aussergewéinlechste Geiistinnen aus der jonker Generatioun.

Semer Ensemble
Jiddesch Musek

Um Album "Rescued Treasure" vum Semer Ensemble si Lidder vereent, déi d'Nationalsozialisten 1938 an der Reichskristallnacht zerstéiert hunn. Et ass en Hommage un de Semer-Label vum Hirsch Lewin.

Net verpassen

  • Offre d'emploi: Redakter/Redactrice Web

    radio 100,7

    Den Média de service public 100,7, deen de radio 100,7 bedreift, sicht en/eng neie/nei Redakter/Redactrice fir d'Onlineredaktioun mat engem Aarbechtskontrakt op onbestëmmten Dauer (CDI) fir 40 Stonnen d'Woch.

Programm

Dossieren

  • Chamberwalen 2023

    Am November gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen