Rival Consoles - Articulation Op luese Suelen

Dem West seng Aussoen an deene puer Interviewen, déi hie ginn huet, zeechnen e Museker vun de Schattéierungen. "Säin Talent net esou komplett ze besëtzen, datt ee sech dran aspäert", ass ee wichtege Grondsaz vu sengem Musekmaachen. "Ech hunn net gären iwwerméisseg verschafften oder technesch Saachen, an awer geet et net drëms, dat Einfachst oder Simpelst ze maachen. Et sinn déi dréif Grenzen tëschent dësen zwou Welten, déi ech interessant fannen", seet hien 2016 dem Magasinn Pop Matters.

Seng Retenue ass also keng Scheiheet, mee en Andauchen an d'Nuance, an domat onweigerlech an de Sound-Design. Als Programméier vun eenzegaartegen an evokative Synthesizer-Sounds, als Verfriemer vun Instrumentopnamen an atmosphäresche Klangmoler, bewaffent mat zeg Gittarspedallen ass Rival Consoles a sengem Element a verféiert aus der musikalescher Distanz.

Klassesch mee subtil: Elektronesche Sound-Design um Top

Dat mécht och déi nei Plack, déi aus sechs mëttellaangen Tracks besteet, an den éischter klenglech kléngenden Titel "Articulation" dréit. Och wann een hei déi fein artikuléiert elektronesch Musek fënnt, déi dropsteet, verstoppt den Numm, datt kontinuéierlech Klangformung de Kär vun dëser Musek ass. Niddreg-frequent Oszillatore maachen alles, wat sech ofspillt zyklesch, an d'Tracks dréien a schimmerernde Schattéierunge vu lues a séier erëmkommende Kreesser.

Dëst si klassesch Mëttelen a ginn dem Museker sengem Ruff als Wollef am Schofspelz gerecht. Wat am Ufank wéi en nodenklechen ambienten House-Album dohierkënnt, mécht bei all weiderem Lauschteren nei Dieren an Niveauen op.

"Articulation" ass dobäi zugläich déi bis elo accessibelst a melodiéiste Rival-Consoles Plack. Och d'Längt, oder soe mer d'Kierzt, ass perfekt jugéiert, mat all Track genee der richteger Längt fir een Diagramm-aartegt rhythmescht Motiv zu Enn ze entwéckelen. Esou soll "Articulation" erstane sinn: als rhythmesch Interpretatioune vun einfache Strichdiagrammer, déi melodesch fräi verschafft goufen.

"Sudden Awareness of Now" ass esouguer op Melodien am Villercherspäifen baussen der Fënster baséiert, wéi kënnt een eng méi klischéiert an ofgelutschte Geschicht iwwer ee Stéck Musek verzapen, an dach mécht dat Ganzt ouni Wierder iergendwéi vill méi Sënn. Eng Plack, déi een ouni vill Wierder, mee dofir mat ville Feinheeten a Stëmmungen, eranzitt.